ATALANTA ……………….3
BAYER LEVERKUSEN…. 0
Minkejja li ma kienux il-favoriti, Atalanta qamu għall-okkażjoni u rebħu l-UEFA Europa League meta, grazzi għal hat-trick ta’ Ademola Lookman, fil-finali għelbu lil Bayer Leverkusen bl-iskor ta’ 3-0 biex dawn tal-aħħar sofrew l-ewwel telfa tal-istaġun fil-kompetizzjonijiet kollha … fi 52 logħba.
Min-naħa l-oħra, dan kien l-ewwel suċċess Ewropew għall-Bergamaschi … u l-ewwel rebħ ta’ unur wara 61 sena meta kienu rebħu l-Coppa Italia fl-1962-63.
Mas-suffara inizjali, Atalanta ħarġu fuq l-offensiva u mill-ewwel bdew jippressaw lill-avversarji bil-konsegwenza li ma tawhomx spazju biex jimmanuvraw.
L-ewwel ċans tal-partita wasal fit-tmien minuta proprju minnhom meta Matteo Ruggeri xeħet cross insidjuż u d-daqqa ta’ ras ta’ Gianluca Scamacca ġiet innewtralizzata minn Piero Hincapie.
Fit-12-il minuta, il-Bergamaschi meritatament fetħu l-iskor meta minn azzjoni ta’ corner, id-difiża ta’ Bayer ikklerjat … bil-ballun jaqa’ għand Davide Zappacosta li ġibed mal-linja u kif daħal fil-kaxxa xeħet cross fil-baxx u filwaqt li ħadd ma mess il-ballun, Ademola Lookman ġie minn wara Ezequiel Palacios u sammar il-ballun fix-xibka.
Kien fid-19-il minuta, li Leverkusen ħolqu l-ewwel attakk iżda x-xutt ta’ Josip Stanisic kien wisq ċentrali.
U fl-azzjoni li kien imiss, fil-25 minuta, Ademola Lookman reġa’ kien il-protagonista ta’ La Dea meta Alex Grimaldo qassam ħażin il-ballun f’nofs il-ground biex wasal għand l-attakkant Niġerjan, dar ma’ Granit Xhaka u minn tarf il-kaxxa dawwar il-ballun fir-rokna tax-xibka.
Fil-31 minuta, Atalanta setgħu skorjaw it-tielet goal iżda minn qagħda ideali, Scamacca xxuttja ferm għoli.
Erba’ minuti wara, il-goalkeeper Juan Musso, kien providenzjali għat-Taljani meta salva xutt perikoluż ta’ Alex Grimaldo u fit-38 minuta, ħareġ minn postu fil-ħin biex laħaq qabel Florian Wirtz li seta’ għamel xi forma ta’ ħsara.
Tliet minuti mill-ftuħ tat-tieni taqsima, Hincapie evita goal ċert meta innewtralizza l-cross fil-baxx ta’ Teun Koopmeiners lejn Charles De Ketelaere li kien lest jiddeposita l-ballun fix-xibka.
Fil-55 minuta, minn azzjoni ta’ corner, Wirtz xeħet cross insidjuż iżda ġie kklerjat mid-difiża ta’ Atalanta.
Erba’ minuti wara, Jeremie Frimpong seta’ għamel aħjar meta l-goalkeeper Musso salva parzjalment fuq tentattiv ta’ Alex Grimaldo.
Konxji mill-fatt li riedu jsibu x-xibka biex jerġgħu jidħlu fil-partita, Leverkusen għamlu reazzjoni u ġiegħlu lill-avversarji jirtiraw lura.
Fit-63 minuta, huma resqu viċin b’xutt ta’ Grimaldo li sab lil Musso attent.
U bil-ħin għaddej, il-players tat-team immexxi mill-coach, Xabi Alonso, dehru maħkuma minn nervożiżmu u qatt ma dehru li kienu se jiskorjaw.
Anzi, kienu Atalanta li tawhom id-daqqa mortali meta, fis-76 minuta, Ademola Lookman ittrasforma lilu nnifsu bħala l-eroj tagħhom hekk kif irreġistra t-tripletta personali meta qabad ballun fuq ix-xellug, qabeż lil Edmond Tapsoba u minn pożizzjoni kemmxejn angolata xeħet il-ballun fir-rokna tax-xibka.
U bil-partita mirbuħa u mitlufa, Leverkusen dehru rassenjati għal din it-telfa li waslet fl-aktar mument kruċjali tal-istaġun li kienu qed jaspiraw li jtemmuh mingħajr telfa hekk kif nhar is-Sibt li ġej se jilagħbu l-finali tat-Tazza Ġermaniża kontra Kaiserslautern.
Peró, qatt ma daħlu fil-logħba!
