F’San Vinċenz de Paul kollox jinsab lest biex nhar il-Ħadd li ġej issir il-purċissjoni bil-vari tal-Ġimgħa l-Kbira. Din is-sea hija l-25 sena li ilha ssir din il-purċissjoni.
Grupp ta’ impjegati jkunu ilhom diversi xhur iħejju għal din l-attivita’ li hija waħda mill-aktar imfittxija mir-residenti u l-qraba tagħhom, li jiġu minn kull naħa tal-pajjiż sabiex isegwu din it-tradizzjoni liturġika.
Il-vari, li llum il-ġurnata, jinkludu s-sett kollu, joħorġu mill-Knisja ddedikata lill-Qalb ta’ Ġesu’ għall-ħabta tad-9.30 a.m. u jduru madwar it-toroq ta’ San Vinċenz, li ħafna jqisuh bħala villaġġ Malti, kemm minħabba l-kobor tiegħu kif ukoll għax fih isiru attivitajiet li jixbhu lil dawk li jsiru fl-irħula Maltin.
Il-purċissjoni tal-Ġimgħa l-Kbira f’San Vinċenz de Paul issir madwar ħmistax qabel kull purċissjoni oħra biex fiha jieħdu sehem personaġġi bibbliċi li jkunu akkumpanjati minn banda li ddoqq marċi funebri matul ir-rotta kollha li jgħaddu minnha l-vari.
Fiha jieħdu sehem ukoll impjegati stess. Tajjeb wieħed jgħid ukoll li l-vari kollha, fuq medda ta’ snin, inħadmu mill-impjegat Michael Bonnici, li huwa wkoll skultur.
Ir-residenti ta’ San Vinċenz de Paul, kif ukoll anzjani li jinġiebu minn djar tal-anzjani u l-qraba tagħhom ikollhom l-opportunita’ biex isegwu mill-qrib din l-attivita’ mill-pjazza ta’ quddiem il-knisja.
Il-purċissjoni tiġi organizzata mill-Kumitat Ġimgħa l-Kbira. Fiha jieħdu sehem madwar 180 persuna, fosthom ħaddiema, qraba u volontiera minn diversi parroċċi. Din l-attivita’ hija miftuħa għal kulħadd. Bejn it-Tnejn 14 u l-Ħamis 17 ta’ April, se jkun hemm ukoll bejgħ ta’ qagħaq tal-Appostli, qagħaq tal-għasel, figolli, ħelu ieħor u qsari.
