Il-President tal-Istati Uniti Donald Trump ħabbar li l-Bord tal-Paċi laħaq ftehim għad-“diżarm sħiħ” tal-Ħamas u ta’ gruppi armati oħra f’Gaża. Uffiċjal għoli tal-Ħamas ikkonferma li l-grupp aċċetta l-pjan tal-Bord tal-Paċi biex iwettaq diżarm sħiħ f’Gaża. Iżrael għadu ma kkummentax dwar dan l-iżvilupp.
Fi stqarrija, il-Bord tal-Paċi qal li l-ftehim huwa r-riżultat ta’ xhur ta’ negozjati intensivi u mwettqa b’rieda tajba, u li l-attenzjoni tal-bord issa hija ffukata fuq l-implimentazzjoni tal-istess ftehim.
Dan il-pass jagħmel parti mit-tieni fażi ta’ pjan għall-waqfien mill-ġlied f’Gaża, iffaċilitat mill-Istati Uniti, li jinkludi d-diżarm tal-Ħamas, l-irtirar tat-truppi Iżraeljani u r-rikostruzzjoni ta’ Gaża.
Il-President tal-Istati Uniti qal li Iżrael se jirtira minn Gaża malli jitlesta d-diżarm tal-Ħamas u ddeskriva l-ftehim bħala pass kruċjali biex Gaża finalment tiġi mmexxija minn gvern Palestinjan ġdid.
Trump, fuq is-sit elettroniku tiegħu Truth Social qal li Forza Internazzjonali għall-Istabbilizzazzjoni se taħdem ma’ forza tal-pulizija Palestinjana ġdida biex tieħu r-responsabbiltà li tiżgura s-sigurtà ta’ Gaża għar-residenti tagħha u għall-ġirien tagħha. huwa qal f’post.
Jingħad li l-ftehim jirrappreżenta tragward ewlieni fl-implimentazzjoni tal-Pjan ta’ Trump ta’ 20 Punt, milħuq permezz tal-medjaturi l-Eġittu, il-Qatar u t-Turkija.
Il-ftehim jipprevedi l-elenkar u l-ħażna tal-armi tqal li għad għandhom il-Ħamas taħt superviżjoni Palestinjana. Dan potenzjalment ineħħi l-akbar ostaklu biex tavvanza l-inizjattiva ta’ paċi għal Gaża appoġġjata mill-Istati Uniti.
Uffiċjali Amerikani qalu li l-ewwel se jiġu diżarmati gruppi iżgħar f’Gaża, qabel ma Ħamas jibda jżarma l-infrastruttura militari tiegħu magħmula minn mini, mħażen tal-armi u faċilitajiet tal-produzzjoni, proċess li huma rrikonoxxew li se jieħu ħafna aktar żmien.
Skont il-Ministeru tas-Saħħa ta’ Gaża, li huwa mmexxi mill-Ħamas, mill-inqas 1,168 Palestinjan inqatlu f’attakki Iżraeljani minn mindu daħal fis-seħħ waqfien mill-ġlied bejn l-Iżrael u l-Ħamas f’Ottubru li għadda. Fl-istess perjodu, erba’ suldati Iżraeljani nqatlu f’attakki Palestinjani f’Gaża.
L-Eġittu mistenni jospita laqgħa dalwaqt tal-medjaturi tal-ftehim ta’ waqfien mill-ġlied f’Gaża – grupp li jinkludi wkoll lill-Istati Uniti, il-Qatar u t-Turkija – kif irrapporta kmieni l-bieraħ s-sit tal-aħbarijiet Al-Qahera News.
Sorsi mhux identifikati irrappurtaw li t-taħditiet fil-Kajr bejn il-medjaturi u l-mexxejja tal-Ħamas dwar l-implimentazzjoni tal-pjan ta’ paċi għal Gaża, kienu wasslu għal progress rari madankollu, uffiċjal Iżraeljan stqarr li t-termini proposti ma kinux sodisfaċenti. Aktar kmieni fil-ġurnata, il-midja Iżraeljana rrappurtat li Iżrael kien kontra ftehim li kien qed jiġi diskuss ma’ Ħamas.
F’April ta’ din is-sena, Ħamas irrifjuta l-pjan ta’ diżarm fl-isforzi ta’ paċi ta’ Trump f’Gaża. Dan ix-xahar, il-Ħamas eleġġa mexxej ġdid, Khalil al-Hayya, li ħa post Yahya Sinwar, li nqatel mill-armata Iżraeljana f’Gaża f’Ottubru tal-2024.
F’Settembru tal-2025, kummissjoni ta’ inkjesta tan-Nazzjonijiet Uniti ddikjarat li Iżrael kien wettaq ġenoċidju kontra l-Palestinjani f’Gaża. Il-Ministeru għall-Affarijiet Barranin ta’ Iżrael ċaħad ir-rapport b’mod kategoriku, u ddeskrivih bħala “distort u falz”.
