Il-kap tal-Kumitat Ċentrali tal-Referees tat-Turkija, Ferhat Gundogdu, u erba’ persuni oħra tpoġġew taħt arrest preventiv bħala parti minn investigazzjoni dwar allegata korruzzjoni u manipulazzjoni fil-proċess ta’ amministrazzjoni tal-referees.
Gundogdu u sitt persuni oħra dehru quddiem qorti f’Istanbul, akkużati fost l-oħrajn b’falsifikazzjoni ta’ dokumenti uffiċjali, ksur ta’ fiduċja u akkwist illegali ta’ data personali.
Ħamsa minnhom inżammu arrestati, filwaqt li tnejn oħra ngħataw il-ħelsien b’kundizzjonijiet.
L-investigazzjoni hija l-aħħar skandlu li qed jolqot il-football Tork, sena wara li 149 referee ġew sospiżi fuq akkużi ta’ mħatri illegali.
Il-Ministru tal-Ġustizzja Akin Gurlek qal li l-prosekuturi qed jinvestigaw allegata interferenza fil-klassifikazzjoni, l-assenjazzjoni u l-ħatriet tal-referees, kif ukoll fl-eżamijiet tar-regoli.
Il-pulizija fittxet ukoll fil-kamra tal-VAR fil-kwartieri ġenerali tat-TFF.
Sadanittant, il-federazzjoni għadha ma għamlitx stqarrija diretta dwar l-arresti tal-ogħla uffiċjali tagħha, filwaqt li l-investigazzjoni mistennija tkompli.
