Sparky, kelb tad-Dwana, qabad żewġ passiġġiera Ingliżi li fuqhom kellhom sustanzi illeċiti.
Fi stqarrija, id-Dwana qalet li lbieraħ, wara talba għall-għajnuna mill-kamra tal-kontroll tal-Ajruport, uffiċjali tad-Dwana għamlu tfittxija fuq għaxar passiġġieri rġiel li kienu qed jivvjaġġaw lejn Malta minn Leeds.
Id-Dwana qalet li waqt li kienu qed isiru t-tfixxijiet fil-bagalji tal-passiġġiera, Sparky, grazzi għat-taħriġ li ngħata, rreaġixxa għal żewġ bagalji. Żewġ passiġġieri nstabu li kellhom fil-pussess tagħhom sustanzi illeċiti.
Passiġġier minnhom instab li kien qed iġorr borża tal-plastik bi trab abjad, suspettat li huwa kokaina, u żewġ pakketti ssiġġillati li fihom kien hemm pilloli suspettati li huma Ecstasy.
Il-passiġġier l-ieħor instab li kellu fil-pussess tiegħu grinder bi traċċi ta’ sustanza suspettata li hija Marijuana u pakkett b’sustanza suspettata li hija kannabis.
Il-każ ingħadda lill-Pulizija għal aktar investigazzjoni.