29-il parteċipant ingħataw ċertifikat wara li temmew b’suċċess il-kors tal-Malta FA dwar l-Ewwel Għajnuna Speċifika għall-Isport. Iċ-ċerimonja tal-għoti taċ-ċertifikati saret nhar l-Erbgħa fil-Malta FA Training Grounds.
Iċ-ċertifikati ngħataw wara żewġ sessjonijiet li kellhom l-għan li jsaħħu l-għarfien u l-ħiliet prattiċi tal-ewwel għajnuna fost il-persuni involuti fil-football.
Il-kors, organizzat mill-Malta FA b’kollaborazzjoni mas-Salib l-Aħmar ta’ Malta, kien imfassal apposta għas-sitwazzjonijiet li jistgħu jinqalgħu f’ambjent sportiv. Permezz tiegħu, il-parteċipanti ngħataw l-għarfien u l-kunfidenza meħtieġa biex jirreaġixxu kif xieraq f’każ ta’ emerġenzi mediċi waqt attivitajiet tal-football.
Matul iż-żewġ sessjonijiet, il-parteċipanti studjaw il-prinċipji ewlenin tal-ewwel għajnuna, fosthom ir-rwol u r-responsabbiltajiet ta’ min jagħti l-ewwel għajnuna, il-ħiliet li jistgħu jsalvaw il-ħajjiet u l-proċedura biex jiġu attivati s-servizzi mediċi ta’ emerġenza.
Il-programm kien jinkludi wkoll eżerċizzji prattiċi u xenarji marbuta direttament mal-isport, sabiex il-parteċipanti jkunu jistgħu japplikaw dak li tgħallmu f’sitwazzjonijiet li jistgħu jiltaqgħu magħhom fl-ambjent tal-football.
Din l-inizjattiva tifforma parti mill-impenn kontinwu tal-Malta FA biex tippromwovi ambjent aktar sigur għall-prattika tal-football u tiżgura li dawk kollha involuti fil-logħba jkollhom il-ħiliet meħtieġa biex jirreaġixxu b’mod effettiv f’każ ta’ emerġenza.
Il-viċi-President tal-Malta FA, Adrian Casha, fetaħ iċ-ċerimonja tal-għoti taċ-ċertifikati billi sema’ l-kummenti u r-reazzjonijiet tal-parteċipanti. Huwa mbagħad tkellem dwar l-isforzi kontinwi tal-Assoċjazzjoni u l-investiment sostanzjali li qed isir fit-tħejjija medika fil-faċilitajiet sportivi.
Casha enfasizza li f’każ ta’ emerġenza medika hemm bżonn ta’ reazzjoni immedjata u preċiża, peress li l-ħajjiet jistgħu jkunu f’riskju. Huwa rrikonoxxa wkoll l-impatt pożittiv tas-servizz reġjonali tal-ambulanzi li jaħdem 24 siegħa kuljum, sebat ijiem fil-ġimgħa, u li jkopri aktar minn 30 ground fejn jintlagħbu l-kompetizzjonijiet matul il-ġimgħa.
Huwa rringrazzja wkoll lil dawk kollha li attendew u temmew il-kors tal-ewwel għajnuna speċifika għall-isport, filwaqt li rrikonoxxa l-kontribut essenzjali tagħhom għas-sigurtà waqt il-ġranet tal-logħob.
“L-impenn tagħkom jgħin biex niżguraw li l-players, il-coaches u l-ispettaturi jkunu jistgħu jattendu l-logħbiet tal-football b’serħan il-moħħ,” żied jgħid Casha.
Il-Malta FA awgurat lil 29 parteċipant għas-suċċess tagħhom fit-tlestija tal-kors u rringrazzjat lis-Salib l-Aħmar ta’ Malta għall-kollaborazzjoni u l-kontribut tiegħu fit-tmexxija ta’ dan il-programm ta’ taħriġ.
