Il-Ministru għall-Finanzi u x-Xogħol Clyde Caruana bagħat ittra lill-Ispeaker Anġlu Farrugia fejn ċaħad li huwa b’xi mod żgwida lill-parlament fuq informazzjoni li poġġa fuq il-mejda tal-Kamra.
Caruana saħaq li David Curmi huwa l-persuna li jokkupa l-pożizzjoni ta’ Chairman Eżekuttiv tal-Air Malta u ma jirċievi l-ebda onorarja għall-bord tal-kumpanija. “Is-Sur Curmi jirċievi ħlas biex imexxi l-kumpanija”, temm jgħid Caruana.
Intant f’rapport li deher fuq il-midja soċjali kien allegat li ċ-Chairman Eżekuttiv tal-AirMalta, David Curmi kellu pakkett ta’ €21,500 fix-xahar. Din l-allegazzjoni tmur kontra dak li qal il-Ministru Caruana li kif reġa’ tenna jikteb fl-ittra lill-Ispeaker, huwa kien qal li Curmi ma rċieva l-ebda remunerazzjoni bħala Chairman Eżekuttiv.
