Il-President tal-UEFA, Aleksander Ceferin, qal li l-fiduċja fil-football internazzjonali għadha ma reġgħetx inbniet wara kontroversja dwar pjan tal-FIFA li finalment ġie rtirat. Il-pjan, magħruf bħala Forward Enterprise (FFE), kien jippermetti lill-FIFA tbigħ ishma f’xi kompetizzjonijiet tagħha u qanqal reazzjoni qawwija fid-dinja tal-football.
Ceferin tkellem dwar din is-sitwazzjoni waqt il-Portugal Football Summit, mingħajr ma semma direttament lill-President tal-FIFA, Gianni Infantino, jew lill-FIFA. Madankollu, huwa qal li “proġett” kien kisser l-għaqda tal-football dinji u sostna li mhux kulħadd ipoġġi l-interessi tal-logħba qabel l-ambizzjonijiet personali tiegħu.
F’dan il-kuntest, il-UEFA u l-CONCACAF talbu lill-FIFA tqassam $2 biljun lill-211-il assoċjazzjoni membru tagħha matul it-tliet snin li ġejjin, billi tuża parti mill-fondi ta’ riżerva tagħha. Ceferin u Victor Montagliani, President tal-CONCACAF, qalu li din hija stima konservattiva ta’ dak li l-FIFA tista’ taffordja.
Il-fondi ta’ riżerva tal-FIFA huma mistennija jilħqu $6 biljun sal-aħħar tal-2026.
Iż-żewġ mexxejja argumentaw li anke distribuzzjoni ta’ $10 miljun lil kull membru ma twassalx biex ir-riżervi jinżlu taħt $1.5 biljuni matul iċ-ċiklu finanzjarju 2027-30.
Huma insistew ukoll li dawn il-ħlasijiet għandhom ikunu addizzjonali għall-programm FIFA Forward. Sadanittant, Infantino qal li beda konsultazzjonijiet ma’ uffiċjali u assoċjazzjonijiet membri dwar riformi fil-governanza tal-FIFA.
