Minn Cristian Muscat
Illum u għada tintlagħab l-10 ġurnata tal-Malta Premier, bl-aktar partita attraenti tkun bejn ir-rivali antiki Floriana u Sliema Wanderers, magħrufa aħjar bħala l-Old Firm Derby.
Fiż-żminijiet l-imgħoddija dan il-konfront kien ikun mistenni ħafna hekk kif l-Empire Stadium tal-Gzira kien ikun mimli daqs bajda minħabba r-rivalitá li dejjem eżistiet bejn dawn iż-żewġ timijiet glorjużi.
Peró, minn mindu l-football ma baqax jintlagħab fil-Gżira, din rivalitá bdiet tnaqqas mill-importanza tagħha biex illum prattikament mietet għal kollox.
Intant, il-leaders Birkirkara jaffrontaw lil Naxxar Lions fejn jibdew favoriti li jiksbu d-disa’ rebħa konsekuttiva.
Filwaqt li jittamaw li Floriana u Sliema Wanderers itemmu fi draw, Hibernians jimmiraw li jegħlbu lil Balzan li qed jiddiżappuntaw bil-kbir.
Partita oħra importanti hija dik bejn Hamrun Spartans u Marsaxlokk hekk kif iż-żewġ timijiet jippruvaw jirritornaw għar-rebħ minħabba l-impatt li din il-partita jista’ jkollha rigward it-Top Six.
Gzira United jiffaċċjaw lit-team ta’ qiegħ il-klassifika, Zabbar St Patrick, bil-mira tagħhom tkun li jikkwalifikaw mal-ewwel sitt timijiet.
F’partita interessanti, Melita jiltaqgħu kontra Mosta liema partita tista’ tinfluwenza il-pożizzjonijiet għal mat-Top Six.
Floriana v Sliema W.– Din il-partita tiftaħ il-programm tal-10 ġurnata li hija meqjusa bħala waħda bilanċjata u miftuħa għal kull riżultat hekk kif iż-żewġ timijiet huma konxji li rebħa żżommhom f’kuntatt mal-leaders Birkirkara li flimkien ma’ Floriana għadhom mingħajr telfa.
Min-naħa tagħhom, Sliema Wanderers sofrew telfa waħda biss, jinsabu punt taħt il-Greens u ilhom ma jirbħulhom mit-13 ta’ Diċembru, 2020, bl-iskor ta’ 1-0.
Carlo Zammit Lonardelli jibqa’ dubjuż għal Floriana.
Birkirkara v Naxxar L. – Jidher li bħalissa ħadd ma jista’ jwaqqaf il-furja ta’ Birkirkara hekk kif ġejjin minn tmien rebħiet infila.
Huma jibdew favoriti netti li jieħdu t-tliet punti minn dan il-konfront iżda jridu juru rispett massimu lejn l-avversarji li jinsabu fil-bżonn tal-punti hekk kif jinsabu fil-post ta’ qabel l-aħħar.
Iż-żewġ timijiet għandhom player sospiż – Birkirkara lil Pablo Leonel Gaitan filwaqt li Naxxar Lions għandhom lil Pedro De Assis Barreto.
Iżda Degran Jackson se jirritorna għal-Lions minn sospensjoni.
Balzan v Hibernians – Balzan, li fallew kull ċans li jistgħu jikkwalifikaw għat-Top Six, jaffrontaw lil Hibernians li jinsabu fir-raba’ post.
Il-Pawlisti ma jistgħux ifallu jekk iridu jibqgħu jisfidaw għar-rebħ tal- kampjonat bil-biżgħa li d- distakk ikompli jikber mil- leaders Birkirkara hekk kif bħalissa huwa dak ta’ tmien punti.
Min-naħa tal-Balzanin, ifittxu li jakkwistaw il-punti biex jinqatgħu minn mal-aħħar zewġ timijiet minħabba li jidher li l-istaġun huwa mitmum għalihom … għalkemm jistgħu jdawru l-fortuni tagħhom fit-Tieni Fażi minħabba li kull team jerġa’ jibda minn zero.
Hamrun S. v Marsaxlokk– Din hija partita li Hamrun Spartans iridu jirbħu akkost ta’ kollox.
Dan minħabba li meta fadal żewġ partiti biex jintemm l-ewwel round ta’ din l-ewwel fażi, huma jinsabu fil-periklu li jistgħu ma jikkwalifikawx mat-Top Six.
Jekk Marsaxlokk joħorġu rebbieħa huma jaqbżu lill-istess Spartans fis-sitt post tal-klassifika.
Aktar minn hekk, jiddependi mir-riżultati ta’ Gzira United u Melita rispettivament li jistgħu jiddeterminaw l-eżitu tal- Hamruniżi … dejjem jekk joħorġu telliefa.
Peró, l-Ispartans xejn m’huma għaddejjin minn vena tajba hekk kif ġejjin minn tliet telfiet konsekuttivi.
L-aħħar darba li esperjenzaw din is-sensiela negattiva kienet bejn it-28 ta’ Jannar u t-12 ta’ Frar tas-sena 2018. Huma kienu tilfu kontra Balzan (2-0), Floriana (1-0) u Gzira United (2-1).
L-aħħar darba li ltaqgħu dawn iż-żewġ timijiet kienu Marsaxlokk li ħarġu rebbieħa wara sitt rebħiet infila mill-Ispartans fil- konfronti diretti.
Ix-Xlukkajri se jkunu msaħħa bir-ritorn ta’ Nikolai Muscat minn sospensjoni.
Gzira U. v Zabbar SP – Gzira United jinżlu mmotivati għall-konfront kontra Zabbar St Patrick.
Dan minħabba li rebħa tista’ tkun il-biljett għal mat-Top Six.
Barra minn hekk huma jridu jirritornaw għar-rebħ wara draw kontra Naxxar Lions (1-1) u telfa kontra Birkirkara (1-0).
Iż-żewġ timijiet se jkollhom player lura minn sospensjoni – Christian Saint Ebisindor għal Gzira u Strahinja Jovancic għal Zabbar.
Melita v Mosta– Din hija partita miftuħa għal kull riżultat biż-żewġ timijiet jimmiraw għal rebħa li tista’ tiddeterminalhom posthom fit-Top Six.
Melita se jkollhom jgħaddu mingħajr is-servizzi tal-Kolumbjan, Aldair Simanca Pena, li jinsab sospiż.
