Bejn illum u għada jintlagħab it-tieni leg tal-kwarti-finali tal-UEFA Champions League fejn ikunu magħrufa l-erba’ semi-finalisti ta’ din il-kompetizzjoni tant prestiġjuża.
Mill-erba’ partiti, Barcelona jibdew favoriti li javvanzaw għal mal-aħħar erbgħa meta jospitaw lil Paris St-Germain wara li f’Pariġi kienu ħarġu rebbieħa bl-iskor ta’ 3-2 … għalkemm il-football huwa mprevidibbli u kollox jista’ jseħħ.
Ma tkun l-ebda sorpriża li t-tliet logħbiet l-oħra jidħlu fil-ħin barrani jew jingħataw il-penalties minħabba li huma ferm bilanċjati.
Minħabba l-fatt li r-regola tal-goals away ġiet abolita f’każ li l-aggregate jintemm bl-iskor indaqs, jingħata l-ħin barrani u jekk ma jiġix deċiż ir-rebbieħ, jingħataw il-penalties.
ILLUM
BORUSSIA DORTMUND v ATLETICO MADRID (1-2)
Borussia Dortmund jippruvaw idawru l-iskor favur tagħhom hekk kif jibdew dan it-tieni leg ta’ din il-kwart-finali fi żvantaġġ ta’ 2-1 kontra Atletico Madrid.
L-Ispanjoli rebħu dan il-konfront ferm bilanċjat, li ntlagħab fil-Wanda Metropolitano, wara li Rodrigo De Paul fetaħ l-iskor (4) biex imbagħad irduppjaw permezz ta’ Samuel Lino (32). Iżda Sebastian Haller (81) ta tama ġdida lill-Ġermaniżi.
Min-naħa ta’ Atletico, dawn jinsabu waħedhom fir-raba’ post ta’ La Liga iżda l-istaġun għalihom qed jitqies bħala wieħed diżappuntanti jekk fuq kollox ma jirbħux dan l-unur tant prestiġjuż.
Għal dan il-konfront, huma mistennija jinżlu b’tattika difensiva biex jamministraw il-partita u joperaw bil-kontrattakki.
Immexxija mill-coach, Edin Terzic, Dortmund għandhom neqsin lil Ramy Bensebaini u Samuel Bamba filwaqt li Samuel Lino u Memphis Depay mhux se jilagħbu għal Atletico … minħabba li kollha jinsabu mweġġgħin.
BARCELONA v PARIS ST-GERMAIN (3-2)
Barcelona jimmiraw li jkomplu jibnu fuq ir-rebħa ta’ 3-2 li rreġistraw kontra Paris St-Germain fil-Parc des Princes biex illum ikollhom il-vantaġġ psikoloġiku meta jilagħbu quddiem il-partitarji tagħhom stess.
It-team immexxi mill-coach, Xavi Hernandez, ħareġ rebbieħ bi tliet goals skorjati minn Raphinha (37, 62) u Andreas Christensen (77) minkejja li Ousmane Dembele (48) u Vitinha (50) taw vantaġġ temporanju ta’ 2-1 lill-Pariġini.
Il-coach ta’ PSG, Luis Enrique, saħaq dwar konċentrazzjoni massima għal din il-partita u fuq kollox li ma jerġgħux jiġu ripetuti żbalji difensivi.
Huma ma kinux involuti fil-kampjonat fi tmiem il-ġimgħa u għalhekk setgħu jistrieħu għal dan il-konfront.
B’kuntrast, fil-kampjonat domestiku Barcelona ġejjin minn rebħa ta’ 1-0 għand Cadiz biex baqgħu tmien punti taħt il-leaders Real Madrid.
Xavi ma jistax jinkludi lil Andreas Christensen u Sergi Roberto minħabba li huma sospiżi.
Paris St Germain ma jistgħux jagħmlu użu minn Nordi Mukiele, Layvin Kurzawa, Sergio Rico u Presnel Kimpembe li qed jirkupraw minn injury.