L-artikolista, Fabrizio Corona tpoġġa taħt investigazzjoni mill-Prosekutur ta’ Milan għal suspett ta’ malafama bbażata fuq kawżi ta’ libell ippreżentati minn Stephan El Shaarawy u l-avukati ta’ Nicolò Casale.
Corona tħarrek minn rappreżentanti taż-żewġ players tas-Serie A li kienu ssemmew fost dawk involuti fl-iskandlu tal-imħatri fl-Italja.
Corona semma’ lil El Shaarawy u Casale fl-aħħar intervista tiegħu ma’ programm televiżiv il-ġimgħa li għaddiet. L-avukati tal-attakkant ta’ Roma u tad-difensur ta’ Lazio kienu sostnew li se jieħdu passi legali kontra Corona.
L-eks ‘Re tal-Paparazzi’ kien l-ewwel li żvela li Nicolò Fagioli, Sandro Tonali u Nicolò Fagioli kienu nvestigati mill-FIGC u l-Prosekuturi ta’ Turin fl-iskandlu tal-imħatri.
El Shaarawy u Casale mhumiex taħt investigazzjoni, għalhekk l-avukati tagħhom issa ħadu azzjoni legali kontra Corona.
El Shaarawy infaqa’ jibki wara li skorja l-goal rebbieħ tard fir-rebħa ta’ Roma fuq Monza nhar il-Ħadd.
“Weġġajt għax meta jingħadu affarijiet dwarek li mhumiex veri, anke jekk il-kuxjenza tiegħek hija ċara,” qal l-internazzjonali Taljan.
