Alexander Isak sab ismu marbut ma’ investigazzjoni dwar allegati reati finanzjarji relatati mat-trasferiment tiegħu minn Real Sociedad għal Newcastle United fl-2022.
Skont il-media Svediża, kumpanija minn Gothenburg kellha tirċievi €1.5 miljun bħala parti mill-ftehim, li kien jiswa madwar €70 miljun.
Il-każ huwa parti minn investigazzjoni dwar suspett ta’ ħasil ta’ flus u irregolaritajiet finanzjarji li jinvolvu aġent tal-football.
Isak iddistakka ruħu mill-allegazzjonijiet u qal li ma jafx eżattament x’seta’ ġara, x’qed jiġri u x’inhu minnu. Huwa saħaq li l-players normalment ma jkunux involuti fin-negozjati bejn il-clubs u l-aġenti tagħhom.
L-attakkant Svediż ikkonferma wkoll li ma kienx kellem lill-aġent tiegħu dwar din il-kwistjoni.
