Rebbieħ ta’ midalja tad-deheb Olimpika deher rieqed ħdejn bank f‘park wara li lmenta li tilef l-irqad fil-Villaġġ tal-Atleti, f’Pariġi.
Id-detentur tar-rekord tad-dinja, it-Taljan Thomas Ceccon, kiseb midalja tad-deheb fil-100m backstroke tal-irġiel il-ġimgħa li għaddiet wara li spiċċa fi 52.0 sekondi.
Ceccon, 23 sena, li rebaħ ukoll il-bronż mat-team tar-relay tal-4x100m freestyle, qal li kiseb “ħolma” tat-tfulija billi ta lill-Italja t-tieni deheb tal-għawm fl-Olimpjadi ta’ Pariġi.
Huwa qal: “Ma nistax inkun aktar ferħan. Bħala tifel ta’ 15-il sena, il-coach staqsieni: ‘X’inhi l-ħolma tiegħek?’ Weġibt: ‘Biex nirbaħ l-Olimpjadi’, u hu qalli: ‘Ikkalma’ dejjem kienet il-ħolma tiegħi”.
Iżda aktar tard fil-ġimgħa, Ceccon naqas milli jikkwalifika għall-finali tal-200m backstroke nhar l-Erbgħa, minkejja li kien wieħed mill-favoriti li jieħu d-deheb f’pajjiżu.
It-Taljan semma l-għejja u n-nuqqas ta’ rqad fil-Villaġġ Olimpiku bħala raġuni wara l-prestazzjoni fqira tiegħu fil-heats tal-200m.
“M’hemm l-ebda arja kondizzjonata fil-villaġġ, huwa sħun, l-ikel huwa ħażin,” qal Ceccon. “Ħafna atleti jimxu għal din ir-raġuni: mhix skuża, hija r-realtà ta’ dak li forsi mhux kulħadd jaf.
“Jien diżappuntat li ma għamiltx il-finali iżda kont għajjien wisq. Diffiċli torqod kemm bil-lejl kif ukoll wara nofsinhar.”
Ceccon żied jgħid: “Is-soltu, meta nkun id-dar, dejjem norqod wara nofsinhar: hawn verament niġġieled bejn is-sħana u l-istorbju.”
Din kienet it-taqbida tiegħu, l-għawwiem iddeċieda li jipprova jieħu xi nagħsa f’park lokali.
Fil-fatt, il-qaddief tal-Arabja Sawdija, Husein Alireza, poġġa filmati fuq Instagram li juru lil Ceccon jorqod fuq xugaman abjad flimkien mal-kliem: “Jum il-mistrieħ jirbaħ għada.”
Ceccon mhuwiex l-uniku atleta li lmenta dwar il-Villaġġ Olimpiku. L-għawwiema Awstraljana, Ariarne Titmus, tat tort lill-kundizzjonijiet ġewwa l-villaġġ għan-nuqqas tagħha li ma rebħitx id-deheb fil-200m freestyle.
“Probabbilment ma kienx iż-żmien li kont ħsibt li kont kapaċi għalih, iżda li ngħix fil-Villaġġ Olimpiku jagħmilha diffiċli biex twettaq,” qalet wara li naqset milli tirbaħ il-200m freestyle.
