It-Tieni Assemblea Ġenerali 2026 tal-Malta FA, ikkonfermat il-membri l-ġodda tal-Kumitat Eżekuttiv u l-Kumitati Indipendenti, kif ukoll emendi għall-istatut tal-Assoċjazzjoni.
L-Assemblea Ġenerali saret fis-Centenary Hall, nhar il-Ġimgħa, li għadda.
ELEZZJONI TAL-MEMBRI ORDINARJI TAL-KUMITAT EŻEKUTTIV
Matul l-Assemblea Ġenerali, saret ukoll l-elezzjoni għall-Membri Ordinarji tal-Kumitat Eżekuttiv għall-bqija tal-mandat 2025-27.
Introdott bħala parti mir-riforma tal-istatut tal-Malta FA, il-Bord Eżekuttiv jinkludi rappreżentanti mill-kategoriji kollha tal-ekosistema tal-football Malti, jiġifieri d-diviżjonijiet ewlenin tal-kampjonat, il-Gozo FA, il-Youth FA, il-Malta Football Coaches Association, il-Malta Football Players Association, il-football tan-nisa, il-futsal u l-beach soccer u l-assoċjazzjonijiet membri li jirrappreżentaw il-football rikreattiv.
L-elezzjoni rat bidliet fir-rappreżentanti tal-Premier League, b’Victor Cassar u Johann Said jieħdu post Keith Perry u Michael Valenzia, filwaqt li għall-Futsal u l-Beach Soccer, Mauro Camilleri Darmanin ħa post Mark Borg.
EMENDI GĦALL-ISTATUT TAL-ASSOĊJAZZJONI
L-Assemblea Ġenerali approvat ukoll żewġ emendi ewlenin għall-istatut tal-Malta FA:
Artikolu 61.6 – Bord tal-Appelli:
Ġie propost li l-Artikolu 61.6, dwar in-notifika tal-appelli, jitneħħa kollu kemm hu. Għalhekk, ir-rekwiżit għal parti interessata li tissottometti avviż bil-miktub ta’ intenzjoni li tappella fi żmien tlett (3) ijiem ta’ xogħol min-notifika tad-deċiżjoni għandu jitneħħa. Dan ġie approvat mill-Assemblea Ġenerali.
Artikolu 64 – Bord tal-Protesti:
Ġew proposti wkoll emendi biex tiġi introdotta proċedura ta’ appell komprensiva u mgħaġġla għad-deċiżjonijiet tal-Bord tal-Protesti relatati mal-kompetizzjonijiet tal-Irġiel Anzjani u tan-Nisa Anzjani. L-appelli huma ristretti biss fil-każijiet li ġejjin: (1) id-deċiżjoni tinkiseb bi frodi; (2) il-Bord japplika r-regolamenti ħażin; (3) id-deċiżjoni hija r-riżultat ta’ żball fattwali li jirriżulta mill-proċedimenti jew minn dokumenti li jiffurmaw parti mir-rekords.
Il-proċedura tistabbilixxi skadenzi stretti, tillimita l-ammissjoni ta’ evidenza ġdida, tagħti lill-Bord tal-Appelli setgħat definiti, u tipprovdi għal determinazzjoni finali u vinkolanti mmirata biex tiżgura ċertezza legali u amministrazzjoni mingħajr interruzzjoni tal-kompetizzjonijiet.
L-appell għandu jkun akkumpanjat minn depożitu ta’ €5,000 li għandu jiġi awtomatikament mitluf parzjalment jew kollu kemm hu favur l-Assoċjazzjoni jekk l-appell ma jiġix milqugħ.
ELEZZJONI TAL-MEMBRI TAL-KUMITATI INDIPENDENTI
L-Assemblea Ġenerali inkludiet ukoll l-elezzjoni tal-membri tal-kumitati indipendenti, skont l-Artikolu 55(3) tal-Istatut tal-Malta FA.
Saret elezzjoni għall-korpi ġudizzjarji, jiġifieri l-Kummissarju Dixxiplinari, il-Kumitat ta’ Kontroll, Dixxiplinari u Etika, il-Bord tal-Appelli, il-Korp għar-Riżoluzzjoni tat-Tilwim, u l-Bord tal-Protesti. Kien hemm ukoll elezzjoni għall-Kumitat tal-Etika u l-Konformità.
Il-membri ġew approvati mill-Assemblea Ġenerali għall- perjodu 2026-28.
