Kmieni s-Sibt filgħodu, l-Iżrael attakka lill-Iran b’missili mill-ajru b’reazzjoni għal attakk simili li l-Iran kien wettaq fuq Iżrael aktar kmieni dan ix-xahar.
Il-militar Iżraeljan iddikjara li l-attakki tiegħu laqtu bażijiet militari Iranjani. Fi stqarrija, il-militar Iżraeljan qal li kien qed iwettaq attakki preċiżi fuq siti militari fl-Iran, biex jirrispondi għal dawk li sejjaħ bħala xhur ta’ attakki kontinwi mill-Iran.
L-Iran, min-naħa tiegħu, ikkonferma li l-attakk Iżraeljan kien immirat lejn siti militari fil-kapitali Tehran u f’lokalitajiet oħra tal-pajjiż, iżda rrimarka li l-ħsarat kienu limitati. Barra minn hekk, l-Iran sostna li huwa “intitolat u obbligat li jiddefendi lilu nnifsu” wara li, mil-lejl għan-nhar, l-Iżrael nieda attakki mill-ajru ta’ ritaljazzjoni kontra l-pajjiż.
Fi stqarrija, il-Ministeru tal-Affarijiet Barranin Iranjan ikkundanna l-attakk Iżraeljan u ddeskrivih bħala “ksur ċar” tal-liġi internazzjonali.
L-Iżrael ilu jhedded li jwettaq dan l-attakk għal ġimgħat, u seħħ aktar minn sena wara l-attakk tal-Ħamas fuq l-Iżrael, li ħoloq il-kunflitt li għadu għaddej fil-Lvant Nofsani.
