Raġel ta’ 30 sena residenti Ħal Qormi inżamm taħt arrest wara li ġie mixli b’diversi każi ta’ serq, li kiser il-kundizzjonijiet tal-Qorti u li sar reċediv.
Andreas Buhagiar kien mixli li f’Settembru tal-2023, seraq vettura tal-għamla Toyota Vitz minn San Pawl il-Baħar.
Huwa ġie mixli wkoll li fil-lejl ta’ bejn it-13 u l-14 ta’ Ottubru, seraq diversi għodod u kompressuri minn garaxx f’Ħal Qormi, u li għamel ħsara fil-proprjetà ta’ ħaddieħor.
Akkużi oħra kontrih jgħidu li fl-14 ta’ Ottubru li għadda, seraq pjanċi tar-reġistrazzjoni minn fuq vettura u li seraq ammont ta’ flus minn stabbiliment fir-Rabat.
Dan filwaqt li ġie mixli li matul ix-xahar ta’ Frar li għadda jew qabel, naqas milli jħares il-kundizzjonijiet tal-ħelsien mill-arrest imposti fuqu f’Marzu tal-2020.
Buhagiar wieġeb mhux ħati tal-akkużi u nżamm taħt arrest preventiv wara li ma saret l-ebda talba għall-ħelsien mill-arrest tiegħu.
Il-prosekuzzjoni f’dan il-każ tmexxiet mill-Avukat Giuliana Magro Conti mill-Uffiċċju tal-Avukat Ġenerali flimkien mal-Ispetturi Roderick Attard, Joseph Mallia, Francesca Maria Calleja u John Sammut.
Għall-imputat dehret l-Avukat Yanika Bugeja.
