Il-Ħamis, f’Pariġi ttellgħu l-poloz tar-raba’ edizzjoni tal-UEFA Nations League 2024-25 fejn ir-rebbieħa preżenti, Spanja, kif ukoll ir-rebbieħa renjanti tal-Euro 2020, l-Italja, telgħu fi gruppi xi ftit jew wisq diffiċli.
F’League A G4, Spanja se jkollhom magħhom lid-Danimarka, l-Isvizzera u lis-Serbja li fil-ġurnata tagħhom kollha kapaċi joffru oppożizzjoni denja għalkemm l-Ispanjoli għandhom it-tradizzjoni li kapaċi jirbħu dawn l-unuri tant li huma wieħed mill-ftit pajjiżi li rebħu kollox: Tazza tad-Dinja, Euros u Nations League.
L-Italja, li issa jinsabu taħt il-gwida ta’ Luciano Spalletti, għandhom magħhom lill-Belġju, Franza u Iżrael fejn l-iktar dgħajfa huma dawn tal-aħħar.
Anke ż-żewġ gruppi l-oħra minn League A huma bilanċjati fejn f’dak G1 hemm il-Kroazja, il-Portugall, il-Polonja u l-Iskozja waqt li G3 jikkonsisti fl-Olanda, l-Ungerija, il-Ġermanja u l-Bosnja, fejn jidher li l-promozzjoni hija bejn l-Tulipani u l-Ġermanżi.
L-Ingilterra, li tinsab f’League 2, tidher li għandha terġa’ lura f’League A meta magħhom hemm il-Finalndja, l-Irlanda u l-Greċja li ħadd minnhom ma huwa fost l-elite tal-Ewropa.
F’League C il-gruppi huma ferm bilanċjati tant li tneħħi t-timijiet li kienu f’Pot 4 l-oħrajn huma kollha validi li jistgħu jiksbu l-promozzjoni.
MALTA FI GRUPP BEJN TLIET TIMIJIET
Għall-ewwel darba mindu bdiet tieħu sehem fil-kompetizzjonijiet tal-FIFA u tal-UEFA, Malta telgħet fi grupp kompost minn tliet timijiet li jfisser li se nilagħbu erba’ logħbiet biss, tnejn home u tnejn away, wara li fl-aħħar edizzjoni morna viċin il-promozzjoni meta spiċċajna fit-tieni post wara l-Faroe Islands.
Fin-nuqqas ta’ logħbiet f’din il-kompetizzjoni l-MFA se jkollha tirranġa xi logħbiet ta’ ħbiberija biex timla l-ġranet li ma tkunx impenjata fil-waqfiet internazzjonali.
L-avversarji ta’ Malta f’League D2 huma l-Moldova u Andorra li magħhom għandna rekord kuntrastuż għall-fatt li kontra tal-ewwel lgħabna tmienja, irbaħna darba, ġejna draw tliet darbiet u tlifna erbgħa. F’dawk li huma goals il-Maltin skorjaw sitta u l-Moldova disgħa.
Kontra Andorra r-rekord huwa favur Malta li minn erba’ logħbiet rebħu darba u ġew tliet darbiet bil-goals 5-3 favur tagħna.
Intant l-aħħar żewġ konfronti kienu minn din il-kompetizzjoni li Malta rebħet 3-0 f’Ta’ Qali u draw ta’ 0-0 f’Andorra.
Il-poloz kollha irriżultaw hekk”
League A
Group A1: Kroazja, Portugall, Polonja, Skozja
Group A2: Italja, Belġju, Franza, Iżrael
Group A3: Olanda, Ungerija, Ġermanja, Bosnia
Group A4: Spanja, Danimarka, Svizzera, Serbja
League B
Group B1: Repubblika Ċeka, Ukrajna, Albanija, Georgia
Group B2: Ingilterra, Finlandja, Irlanda, Greċja
Group B3: Awstrija, Norveġja, Slovenja, Kazakhstan
Group B4: Wales, Islanda, Montenegro, Turkija
League C
Group C1: Svezja, Azerbaijan, Slovakkja, Estonja,
Group C2: Rumanija, Kosovo, Ċipru, Litwanja/Ġibiltá
Group C3: Lussemburgu, Bulgarija, Irlanda ta’ Fuq, Belarus
Group C4: Armenja, Faroe Island, Maċedonja, Latvja
League D
Group D1: Litwanja/Ġibiltá, San Marino, Liechtenstein
Group D2: Moldova, Malta, Andorra
