Minn stħarrig li għamel is-sit elettroniku ewlieni fl-Ingilterra, BBC Sport, il-captain ta’ Liverpool, Jordan Henderson, irriżulta bħala l-Player tas-Sena għall-istaġun 2019/20. Dan meta kiseb 23% tal-voti totali. Il-kollega tiegħu fit-team ta’ Liverpool, Sadio Mane, spiċċa fit-tieni post bi 17% tal-voti waqt li l-midfielder ta’ Manchester City Kevin de Bruyne temm fit-tielet post b’14% tal-voti.
Henderson kellu staġun mill-aqwa ma’ Liverpool, fejn mexxa lir-Reds għall-ewwel post tal-Kampjonat Premier waqt li xprunahom biex jirbħu t-Tazza tad-Dinja tal-Clubs.
Forsi l-wirjiet tiegħu xi drabi jiġu sotto-valutati, l-aktar minħabba l-goals li jiskorjaw Sadio Mane u Mohamed Salah, iżda s-segwaċi tal-football Ingliż ma setgħux ma jinnotawx il-wirjiet tal-ogħla livell li kellu Henderson fl-aħħar xhur.
Matul dan l-istaġun, il-midfielder ta’ Liverpool, skorja tliet goals u pprovda ħames assists, li jirriżultaw fl-aktar staġun prolifiku għalih f’dak li għandu x’jaqsam ma’ involviment ta’ goals sa mill-istaġun 2014/15.
