Il-Kumitat Olimpiku Malti organizza Jum Olimpiku b’suċċess f’Birżebbuġa, li laqqa’ flimkien studenti minn tliet skejjel lokali għal nofs ta’nhar ta’ sport, ħidma f’tim u avventura. Tfal mill-Iskola Immaculate Conception tal-Ħamrun, l-Iskola Santa Monika ta’ Birkirkara u l-Iskola Primarja tal-Isla ħadu sehem f’programm ta’ attivitajiet organizzati fuq il-bajja, b’jum li ffoka fuq it-temi Iċċaqlaq, Tgħallem u Skopri.
Għalkemm il-Jum Olimpiku uffiċjali huwa ċċelebrat kull sena fit-23 ta’ Ġunju biex jitfakkar it-twaqqif tal-Kumitat Olimpiku Internazzjonali f’Sorbona, Pariġi, fl-1894, isiru attivitajiet relatati matul is-sena kollha. Dan l-avveniment, organizzat mill-Akkademja Olimpika Maltija fi ħdan il-Kumitat Olimpiku Malti, bl-appoġġ tal-assoċjazzjonijiet u l-federazzjonijiet sportivi affiljati mal-KOM, kellul-għan li jħeġġeġ lin-nies ikunu attivi, jitgħallmu dwar il-valuri tal-moviment Olimpiku, u jippruvaw dixxiplini sportivi ġodda.
Il-parteċipanti kellhom l-opportunità jduru11-il stand differenti, kull wieħed immexxi minn kowċis kwalifikati u rappreżentanti mill-federazzjonijiet li ħadu sehem, u b’hekk it-tfal kellhom l-opportunità jippruvaw firxa wiesgħa ta’ dixxiplini – ħafna minnhom għall-ewwel darba. Flimkien ma’ sessjoni li spjegat il-Valuri Olimpiċi, l-isports offruti kienu jinkludu Badminton, Beach Football, Beach Handball, Beach Volleyball, Cricket, Golf, Rugby, l-Ibburdjar, Taekwondo u Tug of War.
David Azzopardi, Viċi President tal-KOM u Direttur tal-Akkademja Olimpika, qal:
“L-isport huwa ħafna aktar minn sempliċi kompetizzjoni – huwa skola għall-ħajja. Jgħallem rispett, dixxiplina, perseveranza u l-valur tal-ħidma f’tim liż-żgħażagħ. Ġranet bħal dawn ifakkruna għaliex huwa importanti li nżommu lit-tfal attivi: jgħin fil-bini tal-karattru tagħhom, isaħħaħ il-kunfidenza u jagħtihom ħbiberiji u memorji li jibqgħu magħhom ferm wara l-aħħar tisfira.”
Il-Kumitat Olimpiku Malti rringrazzja lil Olympic Solidarity għall-appoġġ tagħhom fl-organizzazzjoni ta’ dan l-avveniment.
