Bejn illum u għada tintlagħab id-19-il ġurnata tal-BOV Kampjonat Premier hekk kif qed jiżvolġi f’sitwazzjonijiet ferm interessanti kemm fin-naħa ta’ fuq kif ukoll fin-naħa t’isfel.
L-aqwa konfront ta’ dan il-programm huwa dak bejn il-leaders Hamrun Spartans u Valletta li jinsabu fiż-żona tar-relegazzjoni.
Fis-snin 80, dan il-konfront kien iqajjem interess qawwi minħabba r-rivalitá li kienet teżisti bejn dawn iż-żewġ timijiet kif ukoll għax kienu jiddominaw ix- xena.
Illum, 40 sena wara, l-affarijiet huma kompletament differenti. Dan minħabba li filwaqt li l-Ħamruniżi huma t-team li kulħadd irid jirbaħ minħabba l-qawwa li jippossjiedu fl-iskwadra tagħhom, il-Beltin jinsabu fil-periklu tar-relegazzjoni.
Għaldaqstant, illum l-ebda team m’hu se jċedi pulzier għall-objettivi rispettivi tagħhom.
Floriana jiltaqgħu kontra t-team ta’ qiegħ il-klassifika u filwaqt li jittamaw għal żelqa Ħamruniża, fuq il-karta jibdew bħala favoriti kontra team li d-destin tiegħu huwa prattikament magħruf.
Sliema Wanderers jiffaċċjaw lill-ġirien Gzira United li ġejjin minn sensiela pożittiva fit-tentattiv li jsalvaw posthom fl-ogħla diviżjoni.
Marsaxlokk għandhom ostaklu mill-aktar diffiċli meta jiltaqgħu kontra Mosta li huma mdendlin fit-taqtiegħa tar-relegazzjoni.
Fl-istess sitwazzjoni jinsabu Balzan u Naxxar Lions u għaldaqstant jimmiraw li jiksbu t-tliet punti kontra l-ġirien Birkirkara u Hibernians rispettivament li qed jisfidaw għar-raba’ pożizzjoni.
Finalment, Sta Lucia jiffaċċjaw lil Sirens f’partita li ma jistgħux ifallu.
Hamrun S. v Valletta – Bla dubju, dan il-konfront huwa l-aktar wieħed attraenti.
Hamrun Spartans jimmiraw li jirritornaw għar-rebħ hekk kif ġejjin minn draw ta’ mingħajr goals kontra Sliema Wanderers biex ġiet fi tmiem sensiela ta’ tmien rebħiet konsekuttiva.
B’dan id-draw, Floriana reġgħu daħlu fl-isfida għar-rebħ tat-titlu u għaldaqstant xejn għajr minn rebħa ma tissodisfa l-kriterji tagħhom.
Min-naħa tagħhom, Valletta ma jistgħux joħorġu b’idejhom vojta għax jekk Balzan, Naxxar Lions u Sta Lucia, joħorġu rebbieħa, id-distakk jikber għal sitt punti bil-konsegwenza li jinqabdu staġanti fiż-żona l-ħamra meta jkun fadal seba’ partiti għat-tmiem.
Huma se jkunu taħt il-coach il-ġdid, Juan Cruz Gill, wara r-riżenja ta’ Vincenzo Potenza.
Barra minn hekk huma jridu jdawru l-istrateġija tagħhom minħabba li ġejjin minn tliet telfiet infila li fihom ma skorjawx goal.
Valletta għandhom lil Victor Luis Filho sospiż iżda jirritorna Enzo Ruiz.
Fl-ewwel round Hamrun rebħu bl-iskor ta’ 2-1.
Floriana v Gudja U. – Floriana jibdew favoriti kontra team li huwa destinat li fl-istaġun li ġej se jilgħab fiċ- Challenge League.
Il-Gudjani huma l-uniku team li għadu ma kiseb l-ebda rebħa.
Peró, il-Greens iridu juru rispett massimu lejn l-avversarji minħabba li fl-ewwel round spiċċaw fi draw ta’ 1-1 … biex fallew żewġ punti importanti fl-isfida tagħhom għar-rebħ tat-titlu.
Floriana se jkunu msaħħa bir-ritorn ta’ Oualid El Hasni u Maksim Valadzko li ġejjin minn sospensjoni.
Sliema W. v Gzira U. – Wara li rreġistraw tliet rebħiet konsekuttivi, il-moral ta’ Gzira United jinsab għoli ferm fit-tama li jsalva posthom fl-ogħla diviżjoni.
Madankollu huma se jaffrontaw wieħed mill-aktar timijiet konsistenti s’issa f’dan l-istaġun.
Sliema Wanderers huma l-uniku team li Hamrun Spartans ma rnexxilhomx jegħlbu hekk kif iż-żewġ partiti spiċċaw fi draw.
Kemm Gzira kif ukoll Sliema għandhom player sospiż – Zachary Scerri għall-Maroons u Joseph Minala għall-Blues.
Iżda jirritornaw Marcelo Dias u Joachim Adukor rispettivament minn sospensjoni.
Fl-ewwel round Sliema rebħu bl-iskor ta’ 1-0.
Marsaxlokk v Mosta – Dan huwa konfront mill-aktar interessanti fejn rebħa hija prioritá għaż-żewġ timijiet … Marsaxlokk fl-isfida għar-raba’ post u Mosta biex jevitaw ir-relegazzjoni.
Kull team għandu player sospiż – Nikolai Muscat għal Marsaxlokk u Damien Ameni għal Mosta filwaqt li Leandro Aguirre jirritorna għax-Xlukkajri minn sospensjoni.
Fl-ewwel round Mosta għelbu lil Marsaxlokk 3-2.
Birkirkara v Balzan – Dan il-konfront għandu jkun wieħed bilanċjat li jista’ jmur kull naħa minkejja d- differenza fil-pożizzjonijiet.
Għal Birkirkara jirritorna Kurt Zammit minn sospensjoni.
Fl-ewwel round il-Karkariżi ħarġu rebbieħa 3-0.
Hibernians v Naxxar L.– Wara li fl-ewwel round, iż-żewġ timijiet temmew fi draw ta’ mingħajr goals, issa huma għatxana għal rebħa hekk kif Hibernians qed jisfidaw għar-raba’ post filwaqt li Naxxar Lions jistgħu jinqabdu fiż-żona l-ħamra.
Għal-Lions jirritorna Joao Vitor Moura Cardoso minn sospensjoni.
Sta Lucia v Sirens – Dan huwa test ieħor għal Sta Lucia meta jilagħbu kontra Sirens.
Filwaqt li l-Pawlini huma kostretti li jitlifu posthom fil-Premier wara erba’ snin, il-Luċjani ttrasformaw lilhom infushom hekk kif ġejjin minn tliet rebħiet wara xulxin biex ħarġu miż-żona tal-periklu.
Fl-ewwel round iż-żewġ timijiet temmew 0-0.
