Minn Cristian Muscat
Bejn illum u għada tintlagħab it-18-il ġurnata tal-BOV Kampjonat Premier fejn il-leaders Hamrun Spartans għandhom konfront diffiċli kontra Sliema Wanderers li l-obbjettiv tagħhom huwa li jtemmu mal-ewwel tlieta.
Floriana, li jinsabu fit-tieni post tal-klassifika, jiffaċċjaw lil Naxxar Lions li jistgħu jinqabdu fl-inkwiet tar-relegazzjoni.
Partita mill-aktar interessanti hija dik bejn Marsaxlokk u Valletta hekk kif iż-żewġ timijiet għandhom objettivi differenti … ix-Xlukkajri lejn iż-żona Ewropa u l-Beltin lejn dik tas-salvazzjoni.
Konfront bejn żewġ timijiet li ddiżappuntaw huwa dak bejn Balzan u Hibernians li prattikament m’għandhom ċans għal xejn filwaqt li l-pressjoni tinsab fuq il-Balzanin minħabba li jinsabu f’pożizzjoni xejn favorevoli.
Partita bejn il-ġirien Mosta u Birkirkara għandha l-importanza tagħha minħabba li l-Mostin jinsabu fil-bżonn tal-punti.
Żewġ logħbiet li jirrigwardjaw timijiet li qed jissieltu għas-salvazzjoni jinkludu lil Gzira United u Sta Lucia li jaffrontaw lil Sirens u Gudja United rispettivament, b’dawn it-tnejn tal-aħħar huma destinati li jitilfu posthom mal-kbar.
Sliema W. v Hamrun S.– Din hija logħba mill-aktar delikata għal Hamrun Spartans meta jilagħbu kontra t-team rivelazzjoni ta’ dan l-istaġun.
Minbarra li Sliema Wanderers huma wieħed mill- aktar clubs glorjużi, f’dan l-istaġun huma rritornaw fl-ogħla diviżjoni u kisbu r-rispett ta’ kull avversarju u t-tielet pożizzjoni hija kollha mertu tagħhom.
Huma jinżlu għal dan il-konfront b’moral għoli hekk kif ġejjin minn rebħa diretta fuq Marsaxlokk bl-iskor ta’ 2-1.
Min-naħa tal-Ispartans, dawn iridu jibqgħu jżommu s-sensiela pożittiva ta’ tmien rebħiet konsekuttivi.
L-uniku player sospiż huwa dak ta’ Sliema, Joachim Adukor filwaqt li l-Ħamruniżi se jissaħħu bir- ritorn minn sospensjoni ta’ Uros Duranovic u Ederson Bruno Domingos.
Fl-ewwel round iż-żewġ timijiet spiċċaw fi draw ta’ 1-1.
Naxxar L. v Floriana – Floriana jimmiraw li jirritornaw għar-rebħ meta jiltaqgħu kontra Naxxar Lions biex jibqgħu jżommu l-pass ma’ Hamrun Spartans.
Il-Furjaniżi ddiżappuntaw bil-kbir fid-draw ta’ 2-2 kontra Balzan u jekk ma jiksbux it-tliet punti, ikunu qed jgħaddu l-iniżjattiva lill-Ispartans biex iżidu l-vantaġġ li bħalissa huwa dak ta’ ħames punti.
Anke n-Naxxarin iridu joħorġu b’rebħa minħabba l-fatt li m’għadhomx f’żona komda … anzi issa jinsabu fid-dell tar-relegazzjoni wara li fl-aħħar ħames logħbiet kisbu biss żewġ punti … u skorjaw goal wieħed biss.
Huma ma jistgħux jinkludu liż-żewġ players sospiżi, Takuma Yamaguchi u Joao Vitor Moura Cardoso filwaqt li Oualid El Hasni u Maksim Valadzko mhux se jilagħbu għall-Greens minħabba l-istess raġuni.
Fl-ewwel round iż-żewġ timijiet spiċċaw fi draw ta’ 1-1.
Valletta v Marsaxlokk – Din il-logħba ta’ Valletta titqies bħala ‘finali’ hekk kif iridu jissuperaw lil Marsaxlokk filwaqt li jittamaw li t-timijiet ta’ madwarhom ma jirbħux.
Dan minħabba li l-Lilywhites jinsabu fiż-żona tar-relegazzjoni u saħansitra b’periklu kbir li jistgħu jitilfu posthom … u għaldaqstant il-pressjoni tinsab kollha fuqhom.
Telfa għalihom tkun tfisser il-possibbiltá ta’ bidu ta’ katastrofí u għalhekk xejn għajr minn rebħa ma tissodisa l-kriterji tagħhom.
Min-naħa l-oħra, telfa għal Marsaxlokk toqtlilhom kull tama li b’xi moda jistgħu jispiċċaw fit-tielet post.
Iż-żewġ timijiet għandhom player sospiż – Enzo Ruiz għal Valletta u Leandro Aguirre għal Marsaxlokk.
Fl-ewwel round, il-Beltin ħarġu rebbieħa bl-iskor ta’ 1-0.
Mosta v Birkirkara– Mosta jimmiraw li jkomplu jibnu fuq ir-rebħa ta’ 1-0 fuq Valletta … hekk kif se jiffaċċjaw lil Birkirkara li ġejjin minn draw ta’ 1-1 kontra Hibernians.
Rebħa hija prioritá għall-Mostin li tkun tfisser ossiġenu ġdid fl-aspirazzjonijiet tagħhom biex isalvaw il-profil tagħhom fl-ogħla diviżjoni.
Peró, il-Karkariżi mhux se jċedu pulzier konxji mill-fatt li r-raba’ post jista’ jkun il-biljett għall-kompetizzjoni tal-UEFA Conference League.
Huma għandhom lil Kurt Zammit sospiż.
Fl-ewwel round Mosta kienu rebħu 2-0.
Balzan v Hibernians – Balzan jilagħbu kontra Hibernians li t-tnejn ġejjin minn riżultat ta’ draw.
Il-pressjoni tinsab kollha fuq Balzan minħabba li jinsabu fl-inkwiet tar-relegazzjoni. Iż-żewġ timijiet se jinżlu bl-aqwa formazzjoni possibbli.
Fl-ewwel round Balzan kienu ħarġu rebbieħa 2-0.
Sirens v Gzira U. – Fuq il-karta Gzira United jibdew favoriti kontra Sirens, team li jidher destinat iżda fl-istess waqt iridu juru rispett lejn l-avversarji.
Il-Maroons għandhom lil Marcelo Dias sospiż. Huma kienu għelbu lill-Pawlini fl-ewwel round 1-0.
Gudja U. v Sta Lucia– Fit-tentattiv li joħorġu miż-żona l-ħamra, Sta Lucia bilfors iridu jiksbu t-tliet punti kontra Gudja United li jinsabu fil-qiegħ tal-klassifika.
Iż-żewġ timijiet m’għandhomx problemi ta’ players neqsin.
Fil-konfront dirett iż-żewġ timijiet kienu spiċċaw fi draw ta’ mingħajr goals.
