Is-Società Filarmonica Vilhena se tippreżenta “Franġisku”, kunċert ta’ mużika sagra li jfakkar it-800 anniversarju mill-mewt ta’ San Franġisk ta’ Assisi.
Il-kunċert se jittella’ taħt id-direzzjoni tas-Surmast George Debono, bis-sehem tal-Amadeus Chamber Choir u tas-solisti Ruth Casingena u Charles Vincenti. Il-mużika tinkludi siltiet minn kompożituri storiċi kbar bħal Mozart, Bach, Bizet, Puccini u aktar.
Fil-Floriana minn dejjem kien hemm rabta speċjali ma’ San Franġisk minħabba l-kunvent tal-Kapuċċini Franġiskani li ilu jeżisti hemm sa mill-1588. Dan apparti l-preżenza ta’ niċċa ddedikata lil dan il-qaddis li tinsab fit-triq li ġġiblu ismu.
L-attività se ssir is-Sibt 17 ta’ Ottubru 2026, fis-7.30pm, fil-Knisja tas-Salib Imqaddes tal-Patrijiet Kapuċċini, il-Furjana.
Id-dħul huwa mingħajr ħlas u kulħadd huwa mistieden. Wara l-kunċert se jsir riċeviment.
