Il-Bord tad-Diretturi tal-APS Bank plc ltaqa’ fl-10 ta’ Marzu 2022 u approva r-Rapport Annwali u r-Rapporti Finanzjarji Awditjati għas-sena li għalqet fil-31 ta’ Diċembru 2021. Il-Grupp APS irreġistra profitt qabel it-taxxa ta’ €24.1 miljun (2020: €15.8 miljun), żieda ta’ 52.5%, waqt li l-Bank għamel profitt rekord qabel it-taxxa ta’ €23.7 miljun (2020: €15.5 miljun).
F’sitwazzjoni makroekonomika li għadha toħloq sfidi għan-negozji u għall-familji, ir-reżiljenza tal-Grupp u s-saħħa tal-mudell kummerċjali tiegħu reġgħu ħarġu sew bid-dieher f’dawn iż-żminijiet bla preċedent. Dawn ir-riżultati nkisbu fl-istess ħin li l-Grupp APS kompla jsostni l-komunità fuq diversi lati, u jassigura li x-xogħol ma jiqafx u jassorbi l-impatt finanzjarju tal-klima ekonomika attwali.
Marcel Cassar, Kap Eżekuttiv, ikkummenta hekk: “Huwa bi pjaċir li nħabbru dawn ir-riżultati eċċellenti miksubin f’sena meta l-ekonomija Maltija kienet għadha tissielet biex tadatta għall-parametri ġodda tal-era post-Covid, bl-isfidi kollha li din għadha ġġibilna. Dawn ir-riżultati jikkonfermaw kemm hu b’saħħtu l-mudell kummerċjali tagħna, li wassalna biex nirbħu sehem akbar mis-suq billi tejjibna s-servizzi u l-prodotti tagħna, elevajna l-esperjenza tal-klijent, u ssoktajna bit-trasformazzjoni strateġika tal-Bank waqt li bqajna ngħinu l-komunità tadatta għan-‘normalità l-ġdida’.
Fl-istess ħin aħna konxji li għandna inċertezzi ġodda quddiemna, speċjalment minħabba l-kunflitt li qed jevolvi fl-Ukrajna u l-konsegwenzi ġeopolitiċi u ekonomiċi li dan qed ikollu fuq skala globali. Waqt li l-Grupp huwa espost ftit li xejn f’dak ir-reġjun, inkluż fejn jidħlu pagamenti li l-fluss tagħhom jista’ jintlaqat minn deċiżjonijiet ekonomiċi internazzjonali, aħna xorta saħħaħna l-monitoraġġ tagħna tar-riskju u l-osservanza tar-regolamenti skont il-ħtieġa, fost affarijiet oħra billi rfinajna l-kontrolli biex nikkonformaw mas-sanzjonijiet.
L-2022 hija sena ta’ importanza speċjali għall-APS Bank. Għall-ewwel darba fi storja ta’ 112-il sena l-Bank se javviċina s-suq għal finanzjament ta’ kapital f’ishma. Dan il-pass li ilu mistenni mhux se jittieħed għall-prestiġju imma għax huwa parti integrali minn pjan maqbul ħafna snin ilu mal-azzjonisti li jara li l-Bank jikber ukoll billi jiddiversifika l-bażi ta’ dawk li għandhom sehem fih. Aktar ma mmorru, aktar l-istrateġija tagħna li nkunu fuq quddiem nett bħala bank tal-komunità sar ifisser li nkunu pilastru ta’ appoġġ għan-negozji u l-familji Maltin, kif fil-fatt tixhed l-esperjenza ta’ dawn l-aħħar snin. Aħna nistennew bil-ħerqa u bl-ottimiżmu li naraw dan il-proġett importanti jitwettaq b’suċċess fix-xhur li ġejjin.”
Punti ewlenin u indikaturi:
| Grupp | Bank | |||
| 2021 | 2020 | 2021 | 2020 | |
| Profitt qabel it-taxxa (€m) | 24.1 | 15.8 | 23.7 | 15.5 |
| Dħul nett mill-imgħax (€m) | 55.4 | 48.8 | 53.9 | 47.7 |
| Dħul mill-operat (€m) | 63.1 | 55.1 | 61.9 | 54.3 |
| Spejjeż tal-operat (€m) | 40.6 | 33.6 | 39.7 | 33.2 |
| Dħul/telf nett mill-indeboliment (€m) | 1.5 | (5.5) | 1.5 | (5.5) |
| Reġistru tas-self (€m) | 2,066 | 1,802 | 2,066 | 1,802 |
| Assi totali (€m) | 2,795 | 2,421 | 2,773 | 2,407 |
| Depożiti tal-klijenti (€m) | 2,432 | 2,123 | 2,433 | 2,124 |
| Ekwità totali (€m) | 221 | 206 | 198 | 192 |
| ROAE (%) | 7.1 | 5.1 | 7.7 | 5.3 |
| Relazzjoni tas-suffiċjenza tal-kapital (%) | 16.9 | 18.8 | 16.8 | 18.6 |
| Relazzjoni bejn spejjeż u dħul(%) | 64.3 | 60.8 | 64.1 | 61.2 |
Biex tara r-Rapport Annwali tal-APS Bank għall-2021, agħfas hawn.
