L-FA Norveġiża ressqet żewġ ilmenti formali kontra l-President tal-FIFA, Gianni Infantino, fejn talbet investigazzjoni dwar allegat abbuż ta’ poter, kunflitti ta’ interess u kwistjonijiet ta’ governanza. L-ilmenti ġew ippreżentati lill-Kumitat tal-Etika tal-FIFA u lill-Kumitat tal-Governanza, l-Awditjar u l-Konformità.
Il-president tal-FA Norveġiża, Lise Klaveness, qalet li t-tliet kwistjonijiet ewlenin għandhom rabta komuni mal-President Amerikan Donald Trump. Dawn jinkludu l-iskema FIFA Forward Enterprise (FFE), il-Premju għall-Paċi tal-FIFA mogħti lil Trump, u d-deċiżjoni kontroversjali li permezz tagħha tneħħiet is-sospensjoni tal-attakkant Amerikan Folarin Balogun.
L-investitur ewlieni fil-pjan FFE, li kien jinvolvi l-bejgħ ta’ ishma fit-Tazza tad-Dinja, huwa Joshua Kushner, ħu Jared Kushner, li huwa miżżewweġ lit-tifla ta’ Trump. Skont il-federazzjoni Norveġiża, dan iqajjem mistoqsijiet dwar kunflitti ta’ interess u jekk Infantino setax abbuża mill-poteri tiegħu.
Trump kien qal ukoll li ċempel lil Infantino biex jitlob li s-sospensjoni ta’ Balogun tiġi riveduta wara li l-attakkant tkeċċa. Il-FIFA aktar tard ħassret is-sospensjoni tiegħu, u Balogun seta’ jilgħab kontra l-Belġju fir-round tal-Aħħar 16. Infantino ċaħad li kellu xi influwenza fuq id-deċiżjoni, li ttieħdet mill-Kumitat Dixxiplinarju tal-FIFA.
Klaveness qed titlob żvelar sħiħ tal-komunikazzjonijiet kollha, inklużi telefonati, sabiex jiġi stabbilit jekk kienx hemm xi influwenza politika fuq id-deċiżjonijiet.
Il-Kumitat tal-Etika ntalab jinvestiga jekk kienx hemm ksur tal-kodiċi tal-etika, filwaqt li l-kumitat tal-governanza għandu jeżamina jekk il-proċessi finanzjarji, il-kontrolli interni u t-teħid tad-deċiżjonijiet tal-FIFA kinux konformi mar-regoli tagħha
