Lionel Scaloni laħaq ftehim mal-FA Arġentina biex jibqa’ jmexxi lit-team nazzjonali bi ftehim li jista’ jżommu fil-kariga sat-Tazza tad-Dinja tal-2030.
Skont rapporti fl-Arġentina, il-ftehim jinvolvi kuntratt inizjali ta’ sentejn sal-2028, b’għażla li jiġi estiż għal sentejn oħra, bil-kunsens taż-żewġ partijiet. Il-ftehim mistenni jiġi ffirmat formalment waqt il-waqfa internazzjonali ta’ Novembru.
Scaloni, li ħa t-tmexxija tat-team fl-2018, kellu perjodu ta’ suċċess kbir, fejn wassal lill-Arġentina għar-rebħ tat-Tazza tad-Dinja fl-2022, tal-Copa América fl-2021 u fl-2024, kif ukoll tal-Finalissima fl-2022.
Il-kontinwità tiegħu tista’ tipprovdi stabbiltà lill-Arġentina hekk kif it-tim iħejji ruħu għal era ġdida wara l-irtirar futur ta’ Lionel Messi mill-football internazzjonali.
