Villarreal …….2
Liverpool…….3
(Aggregate 5-2)
Liverpool saru l-ewwel finalisti tal-UEFA Champions League meta fit-tieni leg tas-semi-finali, dawru telfa f’rebħa biex għelbu lil Villarreal bl-iskor ta’ 3-2 għal aggregate ta’ 5-2.
Madankollu, il-fatt li Villarreal skorjaw kmieni, Liverpool dehru demoralizzati u damu biex issetiljaw fejn dehru miftuħin fuq wara bil-konsegwenza li l-avversarji bdew jesponu n-nuqqasijiet tagħhom biex daħlu jistrieħu b’vantaġġ ta’ żewġ goals.
Iżda fit-tieni taqsima, Liverpool kienu trasformati bl-inklużjoni ta’ Luis Diaz biex għamlu rimonta u qatgħu l-passaġġ għall-finali.
Villarreal kellhom bidu mill-aqwa hekk kif wara biss tliet minuti fetħu l-iskor meta azzjoni bejn Pervis Estupinan u Francis Coquelin spiċċat biex Etienne Capoue għadda lejn Boulaye Dia li xeħet fix-xibka.
Maħsuda b’dan il-goal, Liverpool għamlu reazzjoni u fil-11-il minuta resqu viċin iżda l-konklużjoni ta’ Diogo Jota għaddiet barra.
Fis-16-il minuta kellu jkun Andy Robertson li mblokka fil-ħin lil Gerard Moreno li deher li seta’ jagħmel il-ħsara wara li rċieva mingħand Estupinan.
Fl-24 minuta, Mohamed Salah żmarka lil Diogo Jota iżda l-goalkeeper, Geronimo Rulli, kien puntwali biex ħareġ minn postu u evita kull periklu.
Liverpool bdew iżidu fil-pressjoni biex jiksbu d- draw peró filwaqt li kienu kemmxejn erratiċi, ma setgħux jinfdu lid-difiża avversarja li kienet waħda kompatta … u l-frustrazzjoni bdiet tikber fost il-players Ingliżi.
Fit-38 minuta, Villarreal appellaw għal penalty meta Giovani Lo Celso kien żmarkat minn Moreno iżda l-goalkeeper, Alisson, wasal fuq il-ballun qabel il-player minkejja li ħabtu f’xulxin.
Madankollu, tliet minuti wara, l-Ispanjoli rduppjaw minn daqqa ta’ ras ta’ Francis Coquelin li spiċċat fir-rokna tas-saqaf tax-xibka mill-cross ta’ Etienne Capoue.
Mal-ftuħ tat-tieni taqsima, Liverpool ħarġu aktar avventurużi fit-tenattiv biex jiksbu l-goal importanti.
Fil-55 minuta, huma kienu sfortunati meta x-xutt ta’ Trent Alexander-Arnold ġie devjat minn Coquelin u ħabat mal-mimduda.
Peró, fit-62 minuta, Liverpool naqqsu distakk meta Salah żmarka lil Fabinho li minn pożizzjoni angolata għeleb lil Rulli. Ħames minuti wara, kien is-sostitut Luis Diaz li kiseb id-draw għat-team immexxi mill-manager Jurgen Klopp li kkonkluda bir-ras mill-cross ta’ Alexander-Arnold.
Fl-74 minuta, Sadio Mane ssiġilla rebħa meta’ qabeż lill-goalkeeper Rulli li ħareġ fi tliet kwarti ta’ ground, avvanza u xeħet fix- xibka.
Il-partita ntemmet fuq nota negattiva meta fis-87 minuta tkeċċa Etienne Capoue għal żewġ karti sofor.
