Il-lottatura Indjana, Vinesh Phogat, ġiet skwalifikata mill-finali tal-lotta tal-50kg fl-Olimpjadi ta’ Pariġi wara li naqset li żżid il-piż għall-finali bil-konsegwenza li effettwat ir-rizultati l-oħra.
Phogat għelbet lill-Kubana, Yusneylis Guzman Lopez, fis-semi-finali nhar it-Tlieta, iżda l-iskwalifika tagħha reġgħet tat iċ-ċans lil Lopez biex tirbaħ il-midalja tad-deheb.
Phogat kienet bdiet fuq nota pożittiva f’dawn l- Olimpjadi hekk kif għelbet lill-Ġappuniża, Yui Susaki, li rebħet il-Kampjonat tad-Dinja erba’ darbiet kif ukoll hija ċ-champion renjanti Olimpika.
Eventwalment hija rebħet l-ewwel tliet logħbiet tagħha biex kisbet post fil- finali.
Iżda dan qatt ma kien se jiġri minħabba li ġiet skwalifikata minħabba li kienet erba’ grammi eħfef mill-kriterji li titlob din il-kategorija.
Il-kontinġent Indjan ipprova jikkontesta din id-deċiżjoni billi appella iżda l-kumitat organizzattiv baqa’ jsostni d-deċiżjoni oriġinali.
B’hekk, fil-finali Guzman Lopez iltaqgħet kontra l-Amerikana, Sarah Ann Hildebrandt liema konfront sar tard ilbieraħ filgħaxija.
Min-naħa l-oħra, il-midalja tal-bronż kienet ikkontestata bejn iċ-Ċiniża Ziqi Feng u Otgonjargal Dolgorjav tal-Mongolja.
Ta’ min jgħid ukoll li Phogat hija magħrufa għall-kampanja kontinwa kontra l-fastidju sesswali.
