Erling Haaland jista’ jħalli lil Manchester City jekk il-club jiġi relegat mill-Premier League wara l-każ relatat mal-allegat ksur tar-regoli finanzjarji.
Rapporti jindikaw li s-City instabu ħatja ta’ 114-il ksur matul il-perjodu bejn l-2009 u l-2018, għalkemm il-club qed jippjana li jappella wara li tiġi deċiża l-piena finali.
Skont rapporti fil-media Ingliża, il-Premier League qed tinsisti għal piena severa, li tista’ tinkludi tnaqqis rekord ta’ punti jew anke relegazzjoni. Intqal ukoll li l-EFL tista’ tappoġġja l-pożizzjoni tal-Premier League, b’xenarju estrem li jista’ jħalli lis-City barra mis-sistema professjonali Ingliża kollha.
Fost l-akbar tħassib għall-club hemm il-futur tal-istilel ewlenin tiegħu. Haaland huwa meqjus bħala l-aktar player prezzjuż tas-City, u rapporti jissuġġerixxu li Arsenal u Real Madrid diġà għamlu kuntatt mar-rappreżentanti tiegħu. Ġie rrappurtat ukoll li l-attakkant Norveġiż m’għandux l-intenzjoni li jibqa’ mal-club biex jgħinu jerġa’ jitla’ fil-Premier League jekk jitneħħielu l-istatus fl-ogħla diviżjoni.
Madankollu, m’hemm l-ebda klawsola ta’ relegazzjoni fil-kuntratt tiegħu, li jfisser li kwalunkwe trasferiment ikun jinvolvi somma finanzjarja enormi.
