Il-futur ta’ Manchester City jinsab taħt il-mikroskopju wara li, skont rapporti, il-club instab ħati tal-maġġoranza l-kbira tal-115-il akkuża miġjuba kontrih mill-Premier League.
Fost dawn hemm l-akkużi ewlenin relatati mar-regoli finanzjarji kif ukoll allegat nuqqas ta’ kooperazzjoni mal-investigazzjoni li damet għaddejja għal diversi snin.
Issa kummissjoni indipendenti ta’ tliet membri se torganizza seduta speċjali biex tiddetermina x’sanzjonijiet għandhom jiġu imposti fuq il-club. Matul din is-seduta, il-Premier League se tkun tista’ tippreżenta r-rakkomandazzjonijiet tagħha dwar il-piena li tqis xierqa, filwaqt li l-avukati tas-City se jippreżentaw argumenti favur it-tnaqqis tal-piena.
Diversi figuri fil-football Ingliż jemmnu li, minħabba n-numru u s-serjetà tal-ksur allegat, għandu jiġi impost tnaqqis kbir ta’ punti li effettivament iwassal għar-relegazzjoni tal-club. Dan iqajjem dilemma għall-Premier League, li trid turi pożizzjoni soda iżda fl-istess ħin tirriskja li titlef wieħed mill-aktar timijiet popolari u stilel ewlenin tagħha, fosthom Erling Haaland.
Manchester City mistennija wkoll jappellaw minn kull verdett ta’ ħtija li jkun ġie mogħti.
