AC Milan għalqu s-sena finanzjarja 2025-26 b’telf ta’ €24 miljun, wara tliet staġuni konsekuttivi ta’ profitt. Dan huwa l-ewwel bilanċ negattiv taħt is-sjieda ta’ Gerry Cardinale u RedBird. L-assenza tal-club mill-kompetizzjonijiet Ewropej kellha impatt qawwi fuq id-dħul, b’telf stmat bejn €70 miljun u €80 miljun.
Minkejja dan, il-pożizzjoni finanzjarja tal-club tibqa’ soda, b’kapital nett ta’ €176 miljun sal-30 ta’ Ġunju 2026. Id-dħul totali, inkluż dak mit-trasferimenti tal-players, laħaq €465 miljun, tnaqqis ta’ biss 6% meta mqabbel mal-istaġun preċedenti.
Fost l-aħbarijiet pożittivi hemm ir-rekord fid-dħul mill-isponsors, li għall-ewwel darba qabeż il-€100 miljun. Żdied ukoll id-dħul mill-istadium, hekk kif Milan kellhom l-ogħla medja ta’ spettaturi fis-Serie A, b’aktar minn 72,000 partitarju kull logħba.
Madankollu, id-dejn finanzjarju nett tela’ għal €145 miljun minn €92 miljun sena qabel, minħabba investimenti strateġiċi u l-użu akbar ta’ linji ta’ kreditu.
Il-club enfasizza wkoll l-importanza tal-proġett tal-istadium il-ġdid flimkien ma’ Inter, li huwa meqjus bħala pass kruċjali għat-tkabbir ekonomiku u sportiv fil-futur.
