Luis Rubiales irriżenja minn President tal-Federazzjoni Spanjola tal-Football wara kritika qawwija talli bies lill-attakkant ta’ Spanja, Jenni Hermoso, fiċ-ċerimonja tal-preżentazzjoni tat-Tazza tad-Dinja wara li fil-finali għelbu lill-Ingilterra bl-iskor ta’ 1-0.
Hermoso ta’ 33 sena baqgħet tisħaq li dik l-bewsa ma kinitx kunsenswali u hija ressqet ilment legali nhar it-Tlieta li għadda.
Rubiales qal li kien issottometta r-riżenja tiegħu lill-aġent president tal-federazzjoni, Pedro Rocha.
“Ma nistax inkompli bil-ħidma tiegħi,” qal lill-media.
Rubiales, li għandu 46 sena, irriżenja wkoll mill-kariga tiegħu ta’ Viċi President tal-kumitat eżekuttiv tal-UEFA.
Il-konsegwenzi tal-bewsa ħakmu l-football Spanjol fl-aħħar ġimgħat u għelbu lir-rebħa ta’ Spanja fit-Tazza tad-Dinja, b’Rubiales jinjora sejħiet ripetuti biex jirriżenja.
Nhar il-Ġimgħa, prosekutur ressaq ilment quddiem il-Qorti Għolja ta’ Spanja – wara x-xhieda ta’ Hermoso – kontra Rubiales għal dak li hu meqjus attakk sesswali.
Rubiales sostna li l-bewsa kienet “reċiproka u “kunsenswali” iżda huwa ġie wkoll sospiż provviżorjament mill-FIFA, eżattament għal 90 ġurnata.
“Wara s-sospensjoni mposta mill-FIFA, flimkien mal-kumplament tal-proċeduri miftuħa kontrija, huwa evidenti li mhux se nkun nista’ nerġa’ lura għall-pożizzjoni tiegħi,” inqrat l-istqarrija ta’ Rubiales.
“Irrealizzjat li jekk inkompli ninsisti, nistenna u nippersevera, ma jien se nikkontribwixxi għal xejn pożittiv … la għall-federazzjoni Spanjola u lanqas għall-football domestiku … għaldaqstant m’hemmx triq oħra.”
