Wara li t-team nazzjonali Malti temm l-impenji tiegħu fil-fażi tal- kampjonat tal-UEFA Nations League meta spiċċa fi draw ta’ 0-0 kontra Andorra, illum jirritorna l-Malta Premier hekk kif jingħata bidu għat-tieni round li huwa kompost minn żewġ kategoriji – it-Top Six u l-Bottom Six.
Kull team jilgħab darba kontra kull avversarju b’total ta’ ħames partiti biex sa tmiem l-ewwel fażi kull team ikun lagħab 16-il partita.
Kull pożizzjoni tiddetermina l-pożizzjoni eventwali wara li tintlagħab it-tieni fażi hekk kif kull team jerġa’ jibda b’zero punti bil-format jerġa’ jirripeti ruħu.
L-aktar partita mistennija mit-Top Six hija dik bejn il-ġirien … il-leaders Birkirkara u t-team li jinsab fl-aħħar post, Hamrun Spartans.
Logħba oħra interessanti hija dik bejn Sliema Wanderers u Hibernians filwaqt li Floriana jaffrontaw lil Mosta.
Fil-veritá, il-logħbiet tal- Bottom Six mhumiex daqstant eċċitanti, bl-objettiv ewlieni jkun li jiġu evitati l-aħħar żewġ postijiet … li f’dan il-każ, Naxxar jilagħbu kontra Melita filwaqt li Zabbar St Patrick jiltaqgħu kontra l-leaders Gzira United.
Il-partita l-oħra tlaqqa’ liż-żewġ timijiet li jinsabu fin-nofs il-klassifika, Marsaxlokk u Balzan.
Birkirkara v Hamrun S.– Bla dubju, dan il-konfront huwa l-aqwa wieħed ta’ tmiem il-ġimgħa.
Birkirkara ġejjin minn telfa ta’ 3-1 kontra Floriana wara disa’ rebħiet konsekuttivi biex sofrew l-ewwel telfa tal-istaġun. Peró, huma xorta waħda għadhom ixxamplati fil-quċċata tal- klassifika meta qed igawdu ħames punti vantaġġ.
Min-naħa ta’ Hamrun Spartans, ġejjin minn rebħa ta’ 2-1 fuq Gzira United biż-żewġ goals jaslu lejn l-aħħar tal-konfront biex ikkwalifikaw mat-Top Six.
Mingħajr tlaqliq, s’issa dan huwa staġun diżappuntanti għall-Ispartans u għaldaqstant iridu jibdew juru l-forma tas-sentejn preċedenti li fihom saru champions.
Peró, għadu xejn m’hu mitluf għall-Ħamruniżi minħabba li t-tieni fażi tista’ tagħtihom iċ-ċans li jaqilbu kollox ta’ taħt fuq!
Huma se jkunu mingħajr Ryan Camenzuli li sofra injury fil-hamstring waqt li kien qed jilgħab ma’ Malta iżda jirritorna Mattias Ellul minn sospensjoni.
Għal Birkirkara, Gnamien Gislain Yikpe huwa sospiż.
Fl-ewwel round, Birkirkara għelbu lil Hamrun bl-iskor ta’ 3-2.
Sliema W. v Hibernians – Din hija partita bilanċjata u miftuħa għal kull riżultat.
Iżda ma tkun l-ebda sorpriża jekk tispiċċa fi draw bħal ma ġara fl-ewwel round meta ż-żewġ timijiet temmew fi draw ta’ mingħajr goals.
F’dan l-istadju, żelqa tista’ tkun detrimentali hekk kif Sliema Wanderers jinsabu fit-tielet post segwiti mill-istess Hibernians … u t-telf ta’ punti jkun ifisser distakk akbar mil-leaders Birkirkara.
Fl-aħħar tliet logħbiet, is-Slimiżi u l-Pawlisti kisbu żewġ rebħiet u draw kull wieħed … u mistennija jinżlu bl-aqwa formazzjoni possibbli.
Floriana v Mosta – Friski mir-rebħa ta’ 3-1 fuq Birkirkara, Floriana huma l-uniku team mingħajr telfa u għaldaqstant jibdew favoriti li jiksbu t-tliet punti.
Iżda huma jridu juru rispett massimu lejn Mosta li kapaċi jqumu għall-okkażjoni.
Il-Mostin ġejjin minn draw ta’ 2-2 kontra Balzan iżda dan il-konfront kien biss formalitá minħabba li ż-żewġ timijiet kienu diġá jafu d-destin tagħhom – Mosta mal-ewwel sitta u Balzan mal-aħħar sitta.
Filwaqt li Mosta ma għandhomx problemi, Floriana se jkunu mingħajr is-sospiż Emerson Santos De Souza iżda jirritorna Matias Nicolas Garcia minn sospensjoni.
Fl-ewwel round il-Furjaniżi kienu ħarġu rebbieħa bl-iskor ta’ 2-0.
Gzira U. v Zabbar SP – Gzira United, li se jkunu mmexxija mill-coach Taljan, Giovanni Tedesco, wara r-riżenja ta’ Andrew Cohen, jiltaqgħu kontra t- team ta’ qiegħ il-klassifika, Zabbar St Patrick.
Il-pressjoni tinsab kollha fuq iż-Żabbarin minħabba li jinsabu fil-bżonn tal-punti.
Huma se jkun msaħħa bir-ritorn ta’ Marcelo Barros Santos minn sospensjoni.
Fil-konfront preċedenti il-Maroons għelbu lis-Saints bl-iskor ta’ 3-1.
Marsaxlokk v Balzan – Din hija logħba bejn żewġ timijiet li kellhom aspettattivi kbar iżda ddiżappuntaw bil-kbir hekk kif spiċċaw fil-Bottom Six.
Marsaxlokk, li ssuperaw lil Balzan fl-ewwel round bl-iskor ta’ 2-1, se jkollhom lura lil Nikola Raden minn sospensjoni.
Melita v Naxxar L. – Melita jilagħbu kontra Naxxar Lions li jinsabu fil-post ta’ qabel l-aħħar fejn ifittxu l-ewwel rebħa wara nuqqas ta’ disa’ partiti li fihom tilfu ħamsa.
Għalihom se jirritorna Westherley Garcia Nogueira minn sospensjoni.
Fl-ewwel round iż-żewġ timijiet spiċċaw fi draw ta’ mingħajr goals.
– Cristian Muscat
Melita v Naxxar L. – xxx
– Cristian Muscat
