Minn Cristian Muscat
Wara l-impenji tat-team nazzjonali fil- UEFA Nations League b’għadd ta’ riżultati pożittivi, illum jirritorna l-Malta Premier League meta tintlagħab is-seba’ ġurnata bl- aktar partita li tispikka tkun dik bejn Valletta u Birkirkara.
Bla dubju din mistennija tiġbed attendenza kbira fejn terġa’ tiġġedded ir-rivalitá bejn dawn iż-żewġ timijiet li nibtet fil-bidu tal-Millennju.
Partita oħra mill-aktar interessanti hija dik bejn Hamrun Spartans u Hibernians, żewġ timijiet li matul is-sajf għollew l-aspettattivi tal-partitarji tagħhom b’dawn tal-aħħar ikollhom sjieda barranin filwaqt li l-Ispartans bħal donnhom qed jissaħħu.
Il-ko-leaders ma’ Valletta, Floriana għandhom partita delikata kontra Balzan li qed ikunu sfida denja u jagħtu logħba lil kulħadd.
Il-partita bejn Mosta u Birżebbuġa St Peter’s tiftaħ il-programm meta proprju llum jiltaqgħu fil-Victor Tedesco Stadium.
F’partita oħra li fiha jkunu nvoluti żewġ timijiet min-nofs in-nhar ta’ Malta, Marsaxlokk jibdew favoriti meta jafforntaw lil Zabbar St Patrick .. filwaqt li l-konfront bejn il-ġirien Sliema Wanderers u Gzira United, ikun l-aħħar wieħed ta’ tmiem il-ġimgħa.
Wara waqfien ta’ tliet ġimgħat wieħed irid jara kemm it-timijiet se jirnexxielhom iżommu l-konsistenza u l-kontinwitá fil-logħob tagħhom.
Għat-timijiet fin-naħa t’isfel, dan il-waqfien jista’ jkun “injezzjoni” biex jirriorganizzaw lilhom infushom.
Nistennew u naraw!
Birkirkara v Valletta – Din hija partita bilanċjata li tista’ tmur kull naħa.
Bħalissa Valletta qed igawdu vantaġġ ta’ tliet punti fuq Birkirkara. Prattikament il-pressjoni tinsab fuq iż-żewġ timijiet … Valletta biex iżommu l-ewwel post filwaqt li Birkirkara jridu jirbħu biex jilħqu lill-istess Beltin.
Iż-żewġ timijiet ġejjin minn rebħa hekk kif il-Karkariżi għelbu lil Birżebbuġa SP bl-iskor ta’ 2-0 filwaqt li l-Vallettani għelbu lil Birżebbuġa St Patrick bl-iskor ta’ 3-0.
Jidher li ż-żewġ timijiet se jinżlu bl-aqwa formazzjoni possibbli u għaldaqstant nistennew li naraw partita tal-ogħla livell.
Hamrun S. v Hibernians – Hamrun Spartans, li ġejjin minn tliet rebħiet konsekuttivi, jafforntaw lil Hibernians li jinsabu “feruti” hekk kif ġejjin minn umiljazzjoni ta’ 4-0 kontra Floriana.
Din it-telfa tkompli tfisser il-kriżi li għaddejjin minnha l-Pawlisti hekk kif minn sitt partiti huma ġabru biss ħames punt, bl-unika rebħa li rreġistraw tkun dik proprju fl-ewwel ġurnata, kontra Sliema Wanderers bl-iskor ta’ 2-0.
Telfa oħra tkompli tpoġġihom fil-periklu li ma jikkwalifikawx mat-Top Six.
Wara bidu kwiet, l-Ispartans bħal donnhom ‘tmattru’ u qed isibu l-istess forma li biha ddominaw il-kampjonat għal dawn l-aħħar snin.
Iżda għal din il-logħba huma se jkollhom jgħaddu mingħajr is-servizzi tas-sospiż, Ognjen Bjelicic.
Floriana v Balzan – Floriana jiltaqgħu kontra t-team promoss ta’ Balzan li minkejja li jinsabu fit-tmien post … rebħa tkun tfisser li ttellagħhom punt taħt l-istess Floriana.
Fil-veritá, il-Greens huma wieħed mill-aqwa timijiet ta’ dan l-istaġun iżda l-problema tagħhom hija li l-iskwadra mhijiex twila biżżejjed u għaldaqstant il-bankina tas-sostituti mhijiex daqstant qawwija.
Huma jinżlu għal dan il-konfront b’moral għoli wara li kisbu rebħa kbira fuq Hibernians.
Peró, huma jridu juru rispett massimu lejn l-avversarji tagħhom li, mingħajr ebda pretensjonijiet żejda, huma avversarji denji li kapaċi jirbħu lil kulħadd.
Il-Furjaniżi se jkunu msaħħa bir-ritorn ta’ Yassine Jbira.
Mosta v Birżebbuġa SP – Mosta jibdew favoriti meta jiltaqgħu kontra t-team promoss ta’ Birżebbuġa St Peters’ li għadhom qed ifittxu l-ewwel punt fl-ogħla diviżjoni.
Barra minn hekk, minn sitt partiti huma skorjaw goal wieħed biss, li wasal minn Alex Bruno De Souza Silva fit-telfa ta’ 2-1 kontra Sliema Wanderers.
Min-naħa ta’ Mosta, l-aħħar darba li lagħbu kien fit-13 ta’ Settembru, minħabba li partita kontra Gzira United (fis-sitt ġurnata) tħassret minħabba l-maltemp … u għaldaqstant lagħbu partita inqas … bl-antiċipu tagħha se jintlagħab fl-14 ta’ Ottubru.
Huma kellhom bidu mill-aqwa fejn kisbu tliet rebħiet konsekuttivi u taw l-impressjoni li dan l-istaġun se jkun wieħed speċjali.
Iżda fiż-żewġ partiti sussegwenti huma ġabru biss punt minn possibbiltá ta’ sitta.
Marsaxlokk v Zabbar SP – Dan huwa konfront bejn żewġ timijiet li ġejjin minn telfa – Marsaxlokk kontra Hamrun Spartans (4-1) u Zabbar St Patrick kontra Birkirkara.
It-telfa għal Marsaxlokk kienet tfisser li fallew iċ-ċans li jitilgħu waħedhom f’ras il-klassifika.
Min-naħa taż-Żabbarin, dawn għandhom bżonn il-punti biex ma jinqabdux fil-Bottom Six.
Sliema W. v Gzira U. – Din hija partita bejn iż-żewġ ġirien Sliema Wanderers u Gzira United … iżda d-differenza ta’ punti hija dik ta’ disgħa bil-mira tal-Wanderers hija li jikkwalifikaw mat-Top Six.
Huma ġejjin minn draw ta’ mingħajr goals kontra Balzan.
Min-naħa tal-Gżirjani, iddiżappuntaw bil-kbir u huma biss id-dell tal-istaġun li għadda minkejja li l-iskwadra hija kompost minn bosta players straodinarji.
Minn ħames partiti huma kisbu punt wieħed biss, l-aħħar wieħed kontra Zabbar St Patrick wara erba’ telfiet konsekuttivi.
