Malta Premier: Taqtiegħa ħarxa għal min se jikkwalifika għat-Top Six

Minn Cristian Muscat

Wara l-waqfa għall-partiti internazzjonali fejn Malta kienet impenjata fir-round ta’ kwalifikazzjoni tat-Tazza tad-Dinja 2026, kontra l-Finlandja u l-Polonja, f’dawn l-erbat ijiem jissokta l-Malta Premier b’partiti mill-aktar interessanti hekk kif tiħrax it-taqtiegħa għal min jispiċċa mat-Top Six. 

Ta’ nota huwa l-fatt li din is-27 ġurnata jew aħjar il-11-il programm tal-Closing Round, se jintla­għab kollu fil-Gozo Stadium. 

Peró, fil-veritá  bil-partiti jkunu deċiżivi kien ikun aktar vijabbli li kieku ntlagħbu b’mod simultanju. 

Kien messha ntgħażlet ġurnata oħra biex prog­ramm bħal dan jintlagħab fil-gżira ta’ Għawdex. 

Intant, bl-uniċi żewġ ti­mijiet li huma aċċertati mit-Top Six, hemm sitt timijiet biċ-ċans li fit-tieni round jilagħbu mal-ewwel sitta iżda erbgħa minnhom biss jistgħu jagħmlu dan. 

Barra minn hekk, teżisti wkoll possibbiltá li Hamrun Spartans ma jikkwalifikawx mat-Top Six għal­kemm fil-veritá l-permutazzjonjiet huma limitati. 

Dan iseħħ jekk Sliema Wanderers, Mar­saxlokk, Hi­­­bernians u Mosta jo­ħorġu rebbieħa.  Anke jekk l-Ispartans jegħlbu lil Nax­xar Lions, huma xorta waħda jinqabżu fil-klassifika bil-konsegwenza li f’dan ir-round itemmu fis-seba’ po­żizzjoni. 

Jekk min-naħa l-oħra, dawn l-erba’ timijiet vera­ment joħorġu rebbieħa, l-is­fida għall-ewwel żewġ postijiet tinfetaħ beraħ. 

Sliema W. v Birkirkara – Bla dubju, din hija l-aqwa partita ta’ dan il-programm hekk kif xejn għajr minn reb­ħa ma tissodisfa l-kriterji ta’ Sliema Wanderers biex jaċċertaw  posthom mat-Top Six. 

Min-naħa ta’ Birkirkara, dawn jimmiraw li jakkwis­taw it-tliet punti biex jibq­għu fil-quċċata tal-klassifika. 

Il-Wanderers mistennija li jinżlu bl-aqwa formaz­zjoni possibbli filwaqt li l-Istripes ma jistgħux jutilizzaw lill-goalkeeper Gia­como Volpe u lil Manuel Ignacio Morello minħabba li jinsabu sospiżi wara li tkeċċew fir-rebħa ta’ 2-0 fuq Floriana. 

Fiż-żewġ logħbiet preċe­denti, Birkirkara rebħu l-ewwel waħda bl-iskor ta’ 1-0, bl-oħra tintemm fi draw ta’ 1-1.  

Floriana v Hibernians – Dan huwa konfront bejn żewġ timijiet li fl-aħħar ħarġa naqsu li joħorġu rebbieħa. 

Filwaqt li Floriana sfaw megħluba bl-iskor ta’ 2-0, Hibernians ġew miżmuma fi draw ta’ mingħajr goals minn Balzan. 

Għaldaqstant, Floriana jimmiraw li jitilgħu fl-ew­wel post filwaqt li jittamaw li Birkirkara jfallu kontra Sliema.  

Għal Hibernians riżultat ta’ draw jista’ jkun biżżej­jed iżda skond l-eżitu tar- riżultati ta’ Zabbar St Patrick u Hamrun Spartans. 

Floriana għandhom lil Jose Fernando Gomes Ju­nior sospiż wara li tkeċċa kontra Birkirkara filwaqt li Hibernians jilqgħu lil Lucas Caruana minn sospensjoni. 

Fiż-żewġ partiti diretti Floriana rebħu waħda bl-iskor ta’ 2-0 bl-oħra tin­temm fi draw ta’ 1-1.

Marsaxlokk v Melita – Marsaxlokk jibdew favoriti li jiksbu t-tliet punti li għandhom bżonn biex jibqgħu jisfidaw li jtemmu fl-ewwel żewġ postijiet hekk kif jiffaċċjaw lil Melita li se jkunu qed jissieltu biex ma jispiċċawx mal-aħ­ħar tnejn. 

Marsaxlokk ġejjin minn telfa ta’ 1-0 kontra Naxxar Lions li xejn ma kienet mistennija, għaldaqstant ma jistgħux ifallu. Barra minn hekk iridu juru rispett massimu lejn l-avversarji tagħ­hom.

Melita wkoll ġejjin minn telfa ta’ 2-0 kontra Mosta li kompliet tniżżilhom fil-Bottom Six. 

Għax-Xlukkajri jirritor­naw Jose Ulises Arias u Nikolai Muscat minn sos­pensjoni filwaqt li Aldair Simanca Pena huwa sospiż għal Melita wara li ġabar erba’ karti sofor. 

Iż-żewġ timijiet rebħu partita kull wieħed – Melita bl-iskor ta’ 2-1 u Marsa­xlokk bl-iskor ta’ 3-1.

Hamrun S. v Naxxar L.  – Din hija partita delikata għal Hamrun Spartans li rebħa hija prioritá jekk iridu jkomplu jisfidaw għall-ewwel żewġ postijiet fit-tentattiv li jikkwalifikaw għas-semi-finali għar-rebħ tat-titlu. 

Huma se jilagħbu kontra team li għandu bżonn il-punti biex isalva mir-re­legazzjoni hekk kif jinsab fil-post ta’ qabel l-aħħar. 

L-Ispartans se jkollhom jgħaddu mingħajr is-servizzi tas-sospiż Joseph Mbong filwaqt li Naxxar se jkun bl-aqwa formazzjoni possibbli. 

Fil-partita preċedenti l- Ispartans kienu ħarġu rebbieħa bl-iskor ta’ 6-0. 

Gzira U. v Balzan – Din hija partita bejn żewġ timijiet li se jilagħbu fil-Bottom Six. 

Gzira United se jil­q­għu lura lil  Gabriel Boh­rer Mentz u Thaylor Aldama minn sospensjoni. 

Fiż-żewġ logħbiet pre­ċedenti, kull team rebaħ partita bl-iskor identiku ta’ 2-1. 

Zabbar SP v Mosta – Dan huwa konfront li fih Mosta għandhom bżonn draw biex għat-tieni darba jissiġillaw posthom mat-Top Six. 

Iżda Zabbar St Patrick għandhom il-potenzjali biex idawru r-riżultat favur tagħhom. 

Fl-unika partita bejn dawn iż-żewġ timijiet Mosta kienu ħarġu rebbieħa bl-iskor ta’ 4-2.