Qed jiġi rappurtat li Manchester United laħqu ftehim verbali fil-prinċipju mal-coach Arġentin, Mauricio Pochettino, biex jieħu t-tmexxija tat-team, f’każ li Michael Carrick jitneħħa mill-kariga tiegħu.
Skont rapporti fil-midja Ingliża, it-taħditiet bejn iż-żewġ partijiet għamlu progress sinifikanti u jidher li hemm rieda komuni biex jintlaħaq ftehim.
Pochettino, li bħalissa jmexxi lit-team nazzjonali tal-Istati Uniti, ħareġ bħala l-kandidat ewlieni biex jieħu post Carrick wara l-bidu diżappuntanti tal-istaġun minn United.
Madankollu, il-ħatra tiegħu għadha tiddependi mid-deċiżjoni finali tal-club dwar il-futur ta’ Carrick.
L-Arġentin għandu esperjenza estensiva fil-Premier League, fejn mexxa lil Southampton, Tottenham u Chelsea, filwaqt li fl-2019 wassal lil Tottenham sal-finali taċ-Champions League.
