Raġel ġie arrestat fil-belt ta’ New York b’suspett li kien hu li ta n-nar lil mara fl-istazzjoni tal-ferrovoja Brooklyn.
Il-Kummissarju tal-Pulizija Jessica Tisch f’konferenza tal-aħbarijiet ideskriviet dan il-każ bħala “wieħed mill-agħar atti kriminali li persuna tista’ twettaq fuq persuna oħra.”
Tisch qalet li l-mara kienet qiegħda fl-istazzjoni ta’ Brooklyn meta twaqqfet minn raġel li ta n-nar permezz ta’ lighter.
Il-mara li isimha mhux qiegħed jixxandar mietet fuq il-post. Ir-raġel ġie arrestat wara informazzjoni li daħlet mingħand grupp ta’ studenti li kienu fuq il-post u raw kollox.
Minkejja li l-istudenti qalu li l-mara kienet mixja fl-istazzjoni meta twaqqfet mir-raġel, il-pulizija għadhom qegħdin jaraw il-kameras tas-sigurtà fuq suspetti li l-vittma kienet rieqda fl-istazzjoni għax damet biex indunat li hija kienet qiegħda tingħata n-nar.
Mill-ewwel investigazzjonijiet jirriżulta li ma kien hemm l-ebda kuntatt bejn ir-raġel u l-mara qabel ma seħħ l-attakk tant li hemm suspetti li ż-żewġ persuni ma kinux jafu lil xulxin qabel.
Tisch qalet li fis-sular ta’ fuq tal-istazzjoni kien hemm diversi uffiċjali tal-Pulizija li malli xammew riħa qawwija ta’ duħħan niżlu biex jaraw x’kien qiegħed jiġri. Kien hawn li huma raw mara fuq ġewwa ta’ ferrovija li kienet ħuġġieġa nar.
