Il-manager ta’ Paris Saint-Germain, Mauricio Pochettino, iddikjara li huwa lest li jħalli lill-club Franċiż u jieħu f’idejh lil Manchester United immedjatament.
Minn żmienu bħala l-manager ta’ Tottenham Hotspur, l-Arġentin kien marbut ma’ ċaqliq mar-Red Devils, u x-xnigħat intensifikaw mit-tluq ta’ Ole Gunnar Solskjaer nhar il-Ħadd.
Pochettino ikun lest li jieqaf mill-kariga tiegħu f’Pariġi b’effett immedjat jekk il-ġerarkija f’Old Trafford toffrilu l-impjieg.
Aġġornament bħal dan isegwi rapporti li jsostnu li l-manager huwa f’kunflitt mal-Pariġini, wara li naqas milli jikseb it-titlu tal-Ligue 1 l-istaġun li għadda, filwaqt li l-familja tiegħu baqgħet tgħix Londra.
L-ex midfielder Michael Carrick ħa t-tmexxija temporanja tar-Red Devils wara li Solskjaer ħalla t-team li jinsab fit-tmien post fl-ogħla diviżjoni Ingliża, wara li rebaħ waħda biss mill-aħħar seba’ ħarġiet tagħhom.
Minn meta ħa t-tmun ta’ PSG fl-istaġun li għadda, Pochettino mexxa 53 partita, kiseb 37 rebħa u kiseb Coupe de France f’dak iż-żmien, filwaqt li bħalissa għandhom vantaġġ ta’ 11-il punt fil-quċċata tal-Ligue 1.