Minn Cristian Muscat
Kif bdiet l-imħabba tiegħek lejn il-futbol?
L-ewwel nett, nixtieq nirringrazzjak tal-opportunità għal din l-intervista – tassew napprezzaha. Minn età żgħira kont dejjem tifel kompetittiv u sportiv – dejjem kelli l-ħeġġa u l-passjoni biex inkun attiv, u l-futbol għalija kien bħal mezz kif nesprimi lili nnifsi.
Niftakar li meta mort għall-ewwel sessjoni ta’ training, kont milqugħ minnufih mill-komunità u ħassejtni parti minn xi ħaġa akbar minni. Maż-żmien, il-futbol ma baqax biss logħba għalija – sar parti importanti ħafna minn ħajti. Bdiet tinbet fija dik ix-xewqa li nieħu dan il-passaġġ bis-serjetà, u b’dedikazzjoni u ħidma bla waqfien, illum il-ġurnata jien kburi li nista’ ngħid li jiena pedina għat-tim ta’ Pembroke.
Iddeskrivi l-esperjenza preżenti tiegħek ma’ Pembroke A FC.
Jien ili ma’ Pembroke minn età żgħira ta’ erba’ snin. B’relazzjoni daqshekk twila, l-esperjenza tiegħi ma’ Pembroke ġabet magħha ħafna “highs and lows”. Illum il-ġurnata, nara lura dawk l-esperjenzi – kemm tajbin kif ukoll mhux daqshekk tajbin – u nista’ ngħid li kbirt kemm bħala plejer kif ukoll fuq livell personali. Bħala plejer, dejjem tajt sehem għal dan il-klabb meta kelli l-opportunità li nilbes il-flokk. Ilni nilgħab regolarment mat-tim tal-kbar għal dawn l-aħħar erba’ staguni, fejn ukoll kelli l-unur li nilbes il-faxxa tal-captain għal diversi logħbiet.
Apparti minn hekk, kelli l-opportunità nservi wkoll bħala assistant coach fin-nursery ta’ Pembroke. Nirringrazzja lil kull min kien hemm għalija u tani l-appoġġ ġewwa Pembroke, għax kelli opportunitajiet siewja ma’ dan il-klabb.
X’tikkummenta fuq l-istaġun li għadda għal Pembroke Athleta?
Kien staġun twil u diffiċli ħafna, b’ħafna sfidi kemm fil-grawnd kif ukoll mentalment. Minkejja l-mumenti diffiċli, it-tim baqa’ jiġġieled sal-aħħar u naħseb li dan juri l-karattru tal-grupp. Fl-aħħar irnexxielna nilħqu l-għan tas-salvazzjoni u nemmen li dan għandu jagħti aktar motivazzjoni biex il-klabb jibni fuq dan għall-futur.
X’tikkummenta fuq it-tragward li lħaqt tal-100 partita ma’ Pembroke?
Huwa tragward li jfisser ħafna għalija personalment. Meta tasal għal 100 partita ma’ klabb, ifisser li tkun għaddejt minn ħafna esperjenzi, mumenti tajbin u oħrajn diffiċli. Kburi ħafna li wasalt għal dan it-tragward ma’ Pembroke u aktar kuntent li l-logħba spiċċat b’rebħa importanti għat-tim.
X’tikkummenta fuq il-kowċ, Jeffrey Mifsud?
Il-kowċ għandu r-rwol importanti li jmexxi lit-tim u għandu viżjoni ċara dwar fejn irid jasal. Għalkemm bħal kull relazzjoni professjonali jkun hemm drabi fejn ma naqblux f’kollox, jiena napprezza x-xogħol li jagħmel u l-impenn tiegħu mal-iskwadra. Fl-aħħar mill-aħħar, l-aktar ħaġa importanti hija s-suċċess tat-tim, u jiena dejjem se nagħti l-massimu tiegħi biex ngħin lill-grupp jilħaq l-għanijiet tiegħu u nibqgħu b’saħħitna flimkien.
Kif qed tħares lejn il-futur tiegħek fil-futbol?
Bħalissa qed nieħu kollox pass pass u niffoka biex inkompli naħdem u nitjieb kemm jista’ jkun. Dejjem irrid nisfida lili nnifsi u nara x’opportunitajiet jistgħu jiġu fil-futur. Fil-futbol qatt ma taf x’jista’ jiġri, imma bħalissa l-mentalità tiegħi hi li nibqa’ naħdem bis-serjetà u nżomm il-livell tiegħi għoli kemm jista’ jkun.
Bis-saħħa ta’ Pembroke nista’ ngħid li jien wasalt fejn qiegħed illum, u dan ma stajtx nagħmlu mingħajr l-għajnuna tal-klabb. Qed niffoka bis-serjetà biex nagħmel il-pass li jmiss fil-karriera tiegħi u nġib lili nnifsi f’livell ogħla ta’ kompetizzjoni. Ħdimt ħafna, ksibt esperjenza siewja, u issa nħoss li wasal iż-żmien biex nimxi ’l quddiem u nilgħab f’dixxiplina ogħla.
L-għan tiegħi hu li nkompli nikber – teknikalment, mentalment u fiżikament – u nsib ambjent li jimbuttani biex inkun l-aħjar verżjoni tiegħi bħala plejer. Nemmen li għad għandi ħafna xi noffri, u ninsab eċċitat għal dak li ġej fil-futur.
Għaddi messaġġ finali lil min jixtieq jagħmel karriera ta’ suċċess fil-futbol.
Lil kull min għandu ħolma li jagħmel karriera ta’ suċċess fil-futbol, ngħidlu li kollox jibda b’passjoni u determinazzjoni. Mhux se jkun vjaġġ faċli – ikun hemm sfidi, diżappunti, u kultant mumenti fejn tista’ titlef il-fiduċja fik innifsek. Imma jekk tassew temmen f’dak li trid, u taħdem kuljum biex ittejjeb lilek innifsek, il-futbol jaf iġiblek ħafna aktar milli taħseb.
Ipprova tgħallem minn kull esperjenza – tajba jew ħażina – u żomm dejjem umiltà, rispett u dixxiplina. Il-kostanza tagħmel differenza kbira. U l-aktar importanti – igawdi kull mument, għax il-futbol mhux biss karriera, imma stil ta’ ħajja.
