F’lukanda ewlenija fil-Qawra ilbieraħ saru l-MFA Awards fejn l-attakkant internazzjonali Malti ta’ Hamrun Spartans, Luke Montebello, ġie pprempjat bl-unur tal-Aħjar Player tas-Sena filwaqt li d-difensura ta’ Birkirkara, Stephania Farrugia, rebħet dik tan-Nisa.
B’kollox ingħataw 19-il unur li jkopru l-livelli kollha tal-football Malti, jiġifieri l-BOV Premier League, iċ-Challenge League, in-National Amateur League u l-Kamppjonati tal-Youths u l-Kampjonati tan-Nisa.
Novitá għal din is-sena kienet l-unur The Football Social Responsibility Award li ppremja l-aqwa inizjattiva li tkun ħalliet impatt fuq il-ġustizzja soċjali.
Sar ukoll adattament għall-apprezzament lejn l-Għawdxin ġewwa Malta sabiex l-unur ma jkunx limitat biss lejn xi player jew ieħor, imma jkunu eliġibbli wkoll timijiet u uffiċjali Għawdxin li jkunu ta’ ispirazzjoni għal oħrajn bl-impenn u d-dedikazzjoni tagħhom li joħorġu miż-żona komda u jiksbu suċċess fil-football Malti – The Gozitan Achievement Award.
Ġew ippremjati wkoll l-aqwa players żgħażagħ irġiel u nisa, kif ukoll l-aħjar players fiċ-Challenge League u l-Amateur League, l-aħjar player barrani, l-aħjar coach, l-aqwa skorers f’kull diviżjoni, il-fair play award, kif ukoll l-unur ferm prestiġġjuż – The President’s Award.
Din is-sena wkoll ġie mħabbar isem ta’ player li l-Assoċjazzjoni rrikonoxxiet billi nkludietu fil-Hall of Fame, li huwa riservat għal dawk li jkunu kisbu suċċess straordinarju fil-karriera tagħhom.
Din is-sena l-MFA Awards kellhom aċċenn femminili, fejn minbarra għarfien mistħoqq lejn is-suċċess tat-team nazzjonali tan-nisa li matul l-istaġun 2023/24 laħaq tragward importanti billi kiseb il-promozzjoni fil-UEFA Nations League u allura issa jinsab jikkompeti mal-aqwa 32 team nazzjonali Ewropew, is-serata kienet ippreżentata minn Sarah Bajada filwaqt l-grupp femminili bl-isem ta’ MARA, onora din is-serata bil-kant tiegħu.
Barra minn hekk, l-unuri ġew ippreżentati minn eks players irġiel u nisa li rebħu l-unuri tal-Aqwa Player tas-Sena kif ukoll l-unur tal-Aqwa Skorer fil-passat … kif ukoll oħrajn mill-isponsors tal-MFA li jinkludu l-Bank of Valletta, Izibet, u Assikura, u uħud mill-ogħla uffiċjali tal-MFA.
Ir-rebbieħa kollha kienu:
– L-Aħjar Player tas-Sena:
Luke Montebello (Hamrun S.)
– L-Aħjar Player tas-Sena (Nisa):
Stephania Farrugia (Birkirkara)
– L-Aħjar Coach tas-Sena:
Mauro Camoranesi (Floriana)
– L-Aħjar Player taċ-Challenge League:
Matthew Debattista (Melita)
– L-Aqwa Skorers:
Premier League – Luke Montebello (Hamrun S.)
Challenge League – Andre Carlos Penha da Costa (Melita)
Amateur League – Kurt Borg (Mtarfa)
Kampjonat tan-Nisa – Salamatu Abdulai (Swieqi United)
– L-Isbaħ Goal:
Kaiden Fenech (Birkirkara)
– The Football Social Responsibility Award:
Fgura United
– President’s Award:
Miguel Mifsud
– L-Aqwa Player Barrani:
Yuri de Jesus Messias (Marsaxlokk)
– The Gozitan Achievement Award:
Ann Marie Said (Birkirkara)
– Fair Play Award:
Sirens
– Izibet l-Aqwa Player Amteur League :
Kurt Borg (Mtarfa)
– BOV L-Aħjar Player Żagħżugħ –
Owen Spiteri (Floriana)
– L-Aħjar Player tal-Youths –
Ensell Attard (Mosta)
– Assikura l-Aħjar Player Żagħżugħa –
Kaysia Micallef (Swieqi U.)
– Hall of Fame –
Joe Cini
