L-ex midfielder ta’ Tottenham Hotspur, Mousa Dembele, ħabbar li se jirtira mill-football professjonali fi tmiem il-kuntratt tiegħu.
Il-player ta’ 34 sena għamel isem għalih matul is-sitt snin u nofs tiegħu fit-Tramuntana ta’ Londra, fejn skorja 10 goals u pprovda 12-il assist f’249 dehra għal Tottenham.
Bħalissa Dembele qed jilgħab mal-club mis-Super League Ċiniża Guangzhou City, u l-Belġjan issa kkonferma li se jdendel iż-żarbun ladarba jiskadi l-ftehim attwali tiegħu.
Nhar it-Tlieta, Dembele afferma li għadu ma rtirax uffiċjalment, u kiteb fuq Instagram: “Insellem lil kulħadd, l-ewwel nett nixtieq nirringrazzjakom ilkoll tal-messaġġi li rċevejt.”
“Biex niċċara l-fatti, għadni ma rtirajtx. Għad fadalli sena kuntratt. Imma diġà nista’ ngħid li se nkun qed intemm il-karriera tiegħi wara li jintemm dan l-istaġun. Grazzi lil kulħadd.”
Dembele irreġistra goal wieħed u pprovda erba’ assists f’47 partita għall-club attwali tiegħu fil-kompetizzjonijiet kollha iżda għamel biss tmien dehriet għal Guangzhou City fl-istaġun CSL 2021.
L-ex player ta’ Fulham, AZ Alkmaar u Germinal Beerschot qed jipprepara biex jirtira bir-rebħ ta’ titlu wieħed tal-Eredivisie, Super Cup Olandiża u Tazza Belġjana, kif ukoll 82 logħba għat-team nazzjonali Belġjan.