Hibernians ….….0
Naxxar Lions ….1
Minn Cristian Muscat
Naxxar Lions ħasdu lil Hibernians bl-iskor ta’ 1-0 biex irritornaw għar-rebħ u ħarġu miż-żona tar-relegazzjoni tal-Bottom Six tal- Malta Premier.
Hibernians kienu mingħajr is-servizzi tal-attakkant Lucas Villela Lapert minħabba li kien sospiż.
Qabel il-partita, il-captain ta’ Hibernians Bjorn Kristensen ġie ppremjat bħala l-LifeStar MVP għax-xahar ta’ Marzu 2025 minn rappreżentant ta’ LifeStar, b’din tkun it-353 partita għal dan il-player bil-flokk tal-Pawlisti.
Kienu Naxxar li ħolqu l-ewwel periklu wara seba’ minuti meta l-Ġappuniż, Takuma Yamaguchi, wara li rċieva minn cross mil-lemin kellu xutt mill-viċin li ġie salvat tajjeb mill-goalkeeper Hugo Sacco, li f’din il-partita kien qed jirritorna minflok Pablo Nino Sanchez.
Huma komplew jiddettaw il-logħob u fis-16-il minuta, Barbosa mid-distanza kważi ħasad lill-Pawlisti iżda pront kien Ilias Apostolos li salva minn fuq il-linja fatali.
Hibernians wieġbu erba’ minuti wara meta xutt qawwi ta’ Dexter Xuereb intemm barra.
Iżda fit-33 minuta, Naxxar rebħu penalty meta Apostolos deher imiss il-ballun b’idu fil-kaxxa, biex mill-11-il metru RYAN GILMOUR CASSAR permezz ta’ xutt fil-baxx ma żbaljax.
Hibernians resqu viċin li jiksbu d-draw fil-ħin miżjud tal-ewwel taqsima meta xutt mill-ewwel ta’ Jurgen Degabriele minn tarf il-kaxxa intemm ftit għoli.
Tliet minuti mill-ftuħ tat-tieni taqsima, il-Pawlisti resqu qrib li jsibu x-xibka meta minn azzjoni ta’ corner, Pedro Henrique Nunes Silva kellu d-daqqa ta’ ras tiegħu mill-viċin tintemm ftit barra.
Fis-56 minuta, huma reġgħu heddew iżda l-free-kick ta’ Khevin Rodrigo Fraga kien wisq ċentrali.
Fit-63 minuta, reġa’ kien Degabriele li ttanta xortih, din id-darba b’xutt minn tarf il-kaxxa li ntemm barra.
Naxxar wieġbu fid-69 minuat meta xutt fil-baxx minn pożizzjoni angolata ta’ Bolanos għadda ftit barra.
Fit-72 minuta, il-goalkeeper tal-Lions, Matthias Debono, kien providenzjali meta evita goal ċert fuq xutt ta’ Degabriele.
Hibernians: 30-Hugo Sacco, 5-Kurt Shaw, 8-Rodrigo Khevin Fraga, 9-Natha Felicio Carvalho, 10-Jurgen Degabriele (4-Alfred Silas 78), 11-Bjorn Kristensen, 14-Dexter Xuereb (19-Stanislav Sorokin 78), 21-Alex Bruno De Souza Silva (20-Federico Falcone 63), 22-Ilias Apostolos (23-Matthew Ellul 78), 44-Pedro Henrique Nunes Silva, 99-Rui Bruno Ribeiro – Coach: Branko Nisevic
Naxxar L.: 1-Matthias Debono, 3-Nikolai Micallef, 7-Takuma Yamaguchi (44-Ito Yasukaze 63), 8-Neil Pace Cocks, 9-Edward Orlando Angulo Bolanos, 15-Ryan Gilmour Cassar, 18-Hugo Coelho Dos Santos (4-Bacary Sane 86), 20-Laton, 23-Maicon De Souza Da Silva (30-Jean Paul Farrugia 93), 25-Fernando Barbosa Pereira, 33-Joao Vitor Moura Cardoso – Coach: George Vella
REFEREE: Trustin Farrugia Cann
ASS. REFEREES: James Muscat, Kurt Saliba
RABA’ UFF: Slobodan Petrovic
SKORER: R. Cassar 34 pen (NL)
AMMONITI: N. Micallef, M. De Souza Da Silva, R. Gilmour Cassar (NL)
