Minn Opinjonista
It-trasport f’pajjiżna dejjem kien lok ta’ diskussjoni qawwija u mhux nieqes mill-kontroversja. Kull bidla li saret f’dan is-settur dejjem ġabet magħha diskussjoni qawwija. Saru diversi tibdiliet tul is-snin u fl-aħħar snin, pajjiżna ra investiment bla ebda preċedent fl-infrastruttura tat-toroq ta’ pajjiżna.
Jekk wieħed jara l-proġetti kbar li saru fosthom il-junction tal-Marsa,il-junction ta’ ħdejn l-ajruport, is-Central Link, u l-proġett li għaddej fl-Imsida, wieħed mill-ewwel jirrealiżża l-kobor ta’ proġetti li dan il-Gvern daħal għalihom. Huwa evidenti li s-sistema tat-trasport f’pajjiżna teħtieġ aktar bidliet. Mhuwiex biżżejjed li pajjiżna jinvesti fit-toroq.
In-numru ta’ karozzi li għandna f’pajjiżna huwa kbir u tista’ tgħid riżultat tal-mod kif inħobbu nivvjaġġaw. Il-maġġoranża l-kbira tagħna jippreferu jużaw il-karozza tagħhom fuq kull mezz ta’ trasport iehor. Dan iwassal biex il-volum ta’ vetturi f’ħinijiet partikolari ikun wiehed qawwi ħafna fit-toroq tagħna.
Matul is-snin saru diversi tentattivi biex in-nies jibdew jużaw mezzi ta’ trasport differenti mill-użu tal-karozza biex jivvjaġġaw. Biex insemmi żewġ eżempji, is-servizz estensiv bil-lanċa li llum hemm bejn il-Belt u tas-Sliema u bejn il-Belt u Bormla kif wkoll l-introduzzjoni tas-servizz tal-karozzi tal-linja b’xejn għal kulhadd huma żewġ miżuri li qed iħallu l-impatt pożittiv tagħhom.
Jidher ċar li dawn l-iniżjattivi m’humiex biżżejjed. Jehtieġ ferm aktar. Fid-dawl ta’ dan il-Gvern nieda numru ta’ proposti lkoll intiżi biex iħeġġeġ lin-nies jużaw mezzi ohra ta’ trasport minflok il-karozzi. Il-kummenti tal-pubbliku m’humiex nieqsa imma jekk irridu nindirizzaw ir-realta’ tat-trasport f’pajjiżna jeħtieġ nintroduċu inizjattivi ġodda li bil-mod jibdlu l-kultura ta’ kif inħarsu lejn il-trasport.
Kull bidla li ġiet introdotta f’dan il-qasam dejjem kienet milqugħa b’xettiċiżmu u kritika għax il-verità hi li l-Maltin drajna li għal kull ħaġa nużaw il-karozza u mur ħudielna jew naqsilna l-użu tal-karozza.
Dak li qed jipproponi l-Gvern huma miżuri bilanċjati li jġibu bidla gradwali. Huwa fl-interess ta’ kulħadd li jkun parti minn din il-bidla fit-trasport f’pajjiżna li hi tant hija meħtieġa.
Kalendarju Politiku
April ta’ kull sena ikunu miżgħud b’attività politika li twassal għall-festa tal-Ewwel ta’ Mejju, Jum il-Ħaddiem. Għall-Partit Laburista, tradizzjonalment kienu żewġ avvenimenti li kienu jsiru bi preludju għal din il-festa. F’nofs April iċ-ċeremonja li tfakkar lil Manwel Dimech, okkażjoni li għadha titfakkar anke jekk saret waħda insinjifikanti, u aktar tard it-28 ta’ April, Jum iż-Żgħażagħ Laburisti meta kienet issir laqgħa tal-massa biex jitfakkru l-irvellijiet tat-28 t’April 1958.
Il-format tad-dimostrazzjoni tal-Ewwel ta’ Mejju inbidlet tul is-snin iżda l-Partit Laburista ta’ kull sena dejjem iċċelebra dan il-jum kif jixraq.
Fl-aħħar snin, il-Partit Laburista biddel il-kalendarju tiegħu u l-Konferenża Ġenerali Annwali saret issir f’April minflok ma kien isir qabel lejn l-aħħar ta’ Jannar. Il-bidla kienet marbuta ma’ diversi raġunijiet fosthom li l-Konferenza tal-Partit kellha ssir eqreb lejn il-festa tal-Ewwel ta’ Mejju.
Issa li għaddew tliet snin mill-aħħar elezzjoni ġenerali, il-Konferenża Ġenerali tal-Partit Laburista għandu jkollha impenn akbar mis-soltu. Hija l-konferenza li fil-kalendarju politiku trid tkun wahda li tħares lura lejn il-ħidma li saret mill-partit fil-Gvern fl-aħħar tlett snin iżda għandha tkun il-konferenza li tfassal it-triq ‘il quddiem għaż-żmien li ġej. Konferenza li tkun okkażjoni għad-deleġati tal-Partit biex jibda’ jitfassal ix-xogħol li hemm bżonn li jsir fit-tħejjija għall-elezzjoni ġenerali li jmiss.
Il-Konferenża Ġenerali għandha sservi biex il-Partit Laburista, kemm bl-impenn tad-delegati matulha, kemm bil-ħidma tal-amministrazzjoni u fuq kollox fid-diskors ewlieni tal-Mexxej tal-Partit, għandha sservi bħala sinjal ċar tal-ħidma li trid titwettaq fid-dawl tal-kisbiet kollha li għamel il-Gvern Laburista mill-2013 u fid-dawl tal-messaġġi li l-poplu qed jgħaddi biex flimkien infasslu l-ġejjieni ta’ pajjiżna.
Għarfien tal-Istorja
Id-dokumentarju u l-intervisti li saru fl-okkażjoni ta’ Jum il-Ħelsien kienu mill-aqwa u jixraq ħajr lil dawk kollha li kienu parti minn dan ix-xogħol. Filwaqt li dawn il-produzzjonijiet jispjegaw ħafna mill-istorja ta’ pajjiżna, ifakkru wkoll protagonisti li taw sehmhom biex saret din il-kisba hekk importanti għal pajjiżna.
Li wiehed ifakkar il-passat huwa meħtieġ. L-ewwel nett wieħed irid jifhem minfejn ġej għaliex pajjiż, partit, kull organizzazjoni, kull persuna huwa frott tal-passat tiegħu. Nemmen li f’pajjiżna hemm bżonn ta’ għarfien akbar tal-istorja ta’ pajjiżna. Huwa fatt magħruf li fost il-ġenerazzjonijiet iż-żgħar hemm nuqqas kbir ta’ għarfien tal-mixja ta’ pajjiżna biex seħħ dak kollu li wassalna sal-lum.
Jekk wiehed ma jkunx jaf minn x’hiex għaddew ta’ qablu, wieħed ma jistax japprezza l-valur ta’ dak li inkiseb tul is-snin.
Filwaqt li s-suċċess ta’ pajjiż jibqa’ jinkiseb għax jitħejja għall-futur b’mezzi dejjem addattati għaż-żminijiet, wieħed qatt ma jista’ jinsa’ li l-għażliet tal-lum jistgħu isiru frott ħidma u għażliet ta’ qabel.
