Il-leġġendarju ta’ Rangers, Ian Ferguson, jaf kollox dwar dak li hemm bżonn biex iġib is-suċċess f’Ibrox Park.
Il-midfielder kumbattiv rebaħ 10 kampjonati bħala player ta’ Rangers taħt Graeme Souness, Walter Smith u Dick Advocaat waqt waqfa ta’ 12-il sena bejn l-1988 u l-2000.
Huwa mar l-Awstralja biex itemm il-karriera tiegħu ta’ player u issa qed igawdi karriera fit-tmexxija Down Under fejn ta’ 56 sena jinsab fit-tmexxija ta’ Stirling Macedonia fin-National Premier League ta’ Western Australia.
Ferguson jemmen li ex-Ranger ieħor li segwa rotta simili huwa konkorrent qawwi għax-xogħol hekk kif tkellem dwar il-kredenzjali tal-eks difensur Malti/Awstraljan, Kevin Muscat, bħala s-suċċessur ideali ta’ Michael Beale li tkeċċa mill-kariga.
Muscat kien parti mill-iskwadra ta’ Rangers li rebħet tripletta domestika taħt Alex McLeish fl-2002-03 qabel mar l-Awstralja, fejn lagħab għal Melbourne Victory għal sitt snin, qabel mexxihom għal doppjetta tal-A-League Premiership u Championship f’żewġ okkażjonijiet, wara li qabel serva bħala assistent coach ta’ Ange Postecoglou.
Huwa nħatar manager ta’ Yokohama F. Marinos tal-Ġappun f’Lulju 2021, għal darb’oħra wara l-eks manager ta’ Celtic, Postecoglou, u rebaħ it-titlu tal-J1 League fl-2022 filwaqt li f’dak kurrenti t-team tiegħu jinsab erba’ punti taħt il-leaders meta fadal ħames logħbiet oħra għat-tmiem.
Ferguson, li mexxa wkoll lil Perth Glory u Northern Fury, togħġbu l-idea li Muscat isir il-manager li jmiss ta’ Rangers bit-team kurrenti ta’ Steven Davis u Alex Rae jibqa’ għaddej bħala l-assistenti tiegħu.
Ferguson qal: “Muscat għandu età tajba (50) biex jidħol u jieħu r-riedni. Naħseb li Rangers għandhom bżonn coach b’xi esperjenza biex iżomm il-vapur, u jakkwista ftit kredibbiltà lura u kunfidenza fil-post.
“Huwa tajjeb biżżejjed biex jieħu f’idejh lil Rangers? Inti sempliċiment ma tafx. Huwa ċertament jaf lir-Rangers, kien hemm taħt Alex McLeish,” qal Ferguson.
Muscat huwa l-favorit attwali għall-impjieg tar-Rangers mal-bookmakers, minkejja li rapporti indikaw li l-kapijiet ta’ Ibrox diġà tkellmu ma’ Frank Lampard, filwaqt li l-coach Belġjan, Phillipe Clement, l-aktar reċenti responsabbli minn Monaco, kien imsemmi wkoll.
Ferguson, iżda, kien jappoġġja lil Muscat, u żied: “Huwa għamel xogħol mill-aqwa f’Melbourne Victory u fil-J-League, rebaħ titli f’pajjiżi differenti.
