Minn Cristian Muscat
Proprju llum jitla s-siparju għal dan l-istaġun meta jingħata bidu għall- Premier League li huwa kompost minn format ġdid u mhux se jintlagħab taħt l-awspiċi tal-Malta Football Association iżda taħt l-organizzazzjoni ġdida, Premier League, li ġiet imwaqqfa fl-istaġun li għadda.
Il-kampjonat se jkun jikkonsisti minn żewġ fażijiet – dik tal-ftuħ u dik tal-għeluq.
F’kull fażi, it-12-il team jilagħbu forma ta’ round robin, bl-ewwel sitta jikkwalifikaw għat-Top 6, bis- sitta l-oħra jkunu relegati għall-Bottom 6. Kull team jilgħab darba kontra kull avversarju.
B’hekk f’kull fażi, kull team jilgħabu 16-il partita – 11 u 5.
Iż-żewġ timijiet li jispiċċaw fl-ewwel post taż-żewġ fażijiet jilagħbu Championship Decider.
Jekk f’każ li team jirbaħ iż-żewġ fażijiet, ikun dikrajat champion.
Hamrun S. Zabbar SP – Hamrun Spartans jibdew l-impenji tagħhom kontra t-team promoss ta’ Zabbar St Patrick li jirritorna fl-ogħla diviżjoni wara nuqqas ta’ 20 sena … meta l-aħħar partita li kienu lagħbu kienet nhar is-7 ta’ Mejju, 2005, fir-rebħa ta’ 4-2 fuq Msida St Joseph.
Barra minn hekk din se tkun l-10 darba li ż-Żabbarin se jkunu qed jilagħbu mal-kbar.
U l-aħħar partita li dawn iż-żewġ timijiet lagħbu fil-Premier tmur lura għat-13 ta’ Marzu, 1999, meta ż-Żabbarin kienu ħarġu rebbieħa bl-iskor ta’ 2-1.
Kienu Paul Zammit (illum coach ta’ Sliema Wanderers) li fetaħ l-iskor għall-Ispartans iżda Renis Hyka u Angel Terzyski kienu dawru telfa f’rebħa għal Żabbar.
L-Ispartans diġá rajnihom fil-kompetizzjonijiet Ewropej u minkejja li forsi mhumiex b’saħħithom daqs l-istaġun li għadda huma xorta waħda jinsabu l-favoriti li jirbħu l-kampjonat.
L-akkwisti li nkludew huma Raphael Lopes, Talison, Wendel Barros, Vitao, Daniel Letherby u Mayron.
Min-naħa ta’ Zabbar, dawn iffirmaw lista ta’ players – Stefan Ilic, Djordje Jovicic, Marcelo Barros Santos, Augusto Ferreira, Erick Correia, Strahinja Jovancic, Diogo de Figueiredo Tavares, Wallace Bonilha Felix, Vinicius de Paiva, Joao Pedro de Sa Mendonca, Zachary Grech, Sean Gatt, Luca Camilleri u Jake Micallef.
Balzan v Birkirkara – Din il-partita bejn żewġ ġirien tiftaħ l-istaġun hekk kif iridu jinsew id-diżappunt ta’ dak li għadda.
Filwaqt li Birkirkara spiċċaw fil-ħames post u naqsu milli jikkwalifikaw għall-UEFA Europa Conference League, Balzan salvaw posthom fl-aħħar ġimgħat hekk kif kienu qed jissieltu kontra r-relegazzjoni.
Iż-żewġ timijiet għamlu bosta rtokki biex isaħħu l-iskwadra tagħhom.
Balzan ingaġġaw lil Jake Engerer, Henri Braham Stanic, Isaac Westendorf, Udoyen Alexander Ayo Akpan u Dylan Ciappara.
Min-naħa tal-Istripes, iffirmaw lil Manuel Morello, Shaun Dimech, Giacomo Volpe u Maicon de Souza da Silva.
Sliema W. v Mosta – Sliema Wanderers jibdew favoriti li joħorġu bit-tliet punti kontra Mosta.
Minkejja li l-Wanderers sfaw umiljati minn Noah FC tal-Armenja b’aggregate ta’ 7-0 fil-UEFA Conference League, huma jidhru team trasformat għal kollox, tant, li rebħu s-Summer Cup meta fil-finali għelbu lil Hamrun Spartans bl-iskor ta’ 2-1.
Huma jidhru li se jkunu sfida denja għall-Ispartans meta huma armati tajjeb f’kull dipartiment.
Kien punt li ħeles lill- Mostin mir-relegazzjoni u għaldaqstant iridu jtejbu l-prestazzjonijiet tagħhom għall-fatt li f’dan l-istaġun it-timijiet naqsu bi tnejn.
Fis-suq tat-trasferimenti, Sliema akkwistaw lil Josip Bender, Sergio Filipe Ramos da Silva, Stanley Ohawuchi, Simon Zibo, Steve Pisani, Cain Attard u Adam Magri Overend
Mosta ffirmaw lil Sean Mintoff, Joao Victor de Souza Teixeira, Cristian Fabricio Gomes Machado, Richard Luca Rosa da Silva Sousa u Carlos Gabriel Moreira de Oliveira
Floriana v Melita – Melita jirritornaw fil-Premier wara nuqqas ta’ 12-il sena, mill-2012/13.
Huma għandhom ostaklu diffiċli meta jaffrontaw lil Floriana li jidhru li, bħall-istaġun li għadda, se jkunu qed jisfidaw.
Il-Greens saħħew l-iskwadra tagħhom bl-inklużjoni ta’ Christoffer Mafoumbi, Franklin Sasere, Thiaguinho Santos, Fernando Augusto de Araujo u Anthony Obonogwu.
Melita ffirmaw lil Marc van de Bovenkamp, David Xuereb, Nick Mifsud, Ensell Attard, Aleksander Lubik, Kurt Bondin u Aldair Simanca.
Naxxar L. v Hibernians – Dan huwa konfront bejn żewġ timijiet li temmew fis-sitt post bl-istess ammont ta’ punti – 35.
L-akkwisti tal-Lions huma kollha Maltin – Nikolai Micallef, Myron Micallef, Matthias Fenech, Kayne Haber u Kane Abela filwaqt li l-Pawlisti ħadu lil Kleiton do Monte Lima Basilio, Henrique Nunes Silva, Pablo Sanchez, Federico Falcone u Dexter Xuereb.
Marsaxlokk v Gzira U. – Marsaxlokk jibdew favoriti kontra Gzira United li fl-istaġun preċedenti salvaw mir-relegazzjoni.
Min-naħa tagħhom, ix- Xlukkajri kellhom wirjiet pożittivi fil-UEFA Conference League kontra Partizani tal-Albanija u ġew eliminati b’goal fl-aħħar sekondi.
Dawn iż-żewġ partiti huma l-preludju tal-qawwa ta’ Marsaxlokk għal dan l-istaġun.
Huma akkwistaw lil Jose Ulises Arias, Igor Leandro Goularte do Nascimento, Jefferson de Jesus Santos, Patrick Carvalho Nonato, Guttiner Heider Fernando Costa Tenorio, Lucas Lopez u Enmy Manuel Pena Beltre.
Il-Maroons akkwistaw lil Enrico Pepe, Kevin Tulimieri, Christian Saint Ebisindor, Justin Haber u Jurgen Pisani.
