Minn Cristian Muscat
Kif għażilt l-atletika fost minjiera ta’ sport ieħor?
Minn dejjem kont interessat fl-isport … minn età żgħira ħafna. Bdejt l-atletika bħala sfida għalija nnifsi!
Ta’ kemm bdejt tipprattikka l-atletika?
Bdejt nipprattika l-atletika fl-etá ta’ 30 sena.
X’ħeġġek l-iktar biex tibda tipprattika dan l-isport?
Dejjem kont tqil bħala tifel u bħala adoloxxenti, kont inpejjep u nixrob. Xtaqt bidla drastika f’ħajti u rnexxieli nagħmel dan!
Min kien dak il-persuna li ispirak biex tagħżel l-atletika?
Jien xortija tajba li nkun imdawwar b’nies li jappoġġjawni. Atleti li ilhom f’dan l-isport għal żmien twil ħafna. Wieħed b’mod partikolari huwa Andrew Grech li nsejħulu ‘Idolo’ jispirani ħafna, Hemm ħafna oħrajn li għenuni tul il-vjaġġ tiegħi fl-atletika. Charlton Debono, Christian Bugeja, Aidan Tanti, Dillon Cassar iċ-‘Chippy’, kif ukoll it-tfajla tiegħi, Sarah Perren.
Liema unuri prinċipali irnexxielek tikseb fil-karriera tiegħek?
L-aktar unur ta’ suċċess li għandi f’dan l-isport dejjem se tkun l-ewwel tellieqa tiegħi. Il-Malta Half Marathon 2018. Minn hemm beda kollox. Kienet tiġrija memorabbli mimlija emozzjonijiet għalija!
Liema kien l-aħjar riżultat tiegħek fil-karriera tiegħek sa issa?
L-aħjar ħin li kelli sa issa kien fin-Nofs Maratona ta’ Berlin fil-Ġermanja.
Il-media tagħtikom bizzejed pubbliċità u exposure jew dan isir waqt kompetizzjonijiet importanti bhal mhuma l-Logħob tal-Pajjiżi ż-Żgħar?
Mingħajr ma ninstema’ bla grazzja lejn l-istituzzjoni sportiva hawn Malta, inħoss li nistgħu nagħmlu ħafna aktar bħala pajjiż. Matul dawn l-aħħar snin rajna titjib kbir speċjalment fil-ġenerazzjoni żagħżugħa iżda nħoss li hemm bżonn ta’ aktar investiment.
Għandek xi ħolma li tixtieq tikseb fl-atletika?
Il-ħolma tiegħi hi li xi darba nkun nista’ nikkowċja lit-tfal u naqsam l-esperjenzi tiegħi magħhom.
X’sagrifiċċji / commitments jitlob l-isport li int tippratika?
Kollox jiddependi fuq dak li trid. Kien hemm perjodu fejn kont ossessjonat bil-perfezzjoni tal-ħinijiet u r-riżultati tiegħi. Dan kien jeħtieġ ħafna sagrifiċċji fil-ħajja personali tiegħi.
Għalkemm l-atleti li tikkompeti magħhom huma wkoll ħbieb tiegħek, ninsab persważ li jidħol ukoll ċertu sens ta’ kompetizzjoni fejn wieħed ikun irid jikseb ħin aħjar mill-ieħor. Il-kummenti tiegħek…
Tiġrija hija tellieqa, ovvjament nieħu gost u niċċelebra meta sħabi jmorru tajjeb jew jirbħu imma fl-aħħar mill-aħħar ilkoll irridu nirbħu jew nagħmlu tajjeb. L-iktar ħaġa importanti hija li tgawdi dak li qed tagħmel.
X’kompetizzjonijiet prinċipali se tieħu sehem fihom fil-futur qrib?
Il-Maratona ta’ Brighton matul dan ix-xahar, imbagħad s-sena d-dieħla l-Maratona ta’ Seville.
Għaddi messaġġ lil dawk it-tfal u / jew żgħażagħ li qegħdin jaħsbuha bis-serjetà li jibdew jipprattikaw l-atletika.
Dejjem ftakar għaliex bdejt u qatt ma titlef il-fattur tal-gost. Jien qabel lanqas stajt niġri kilometru… issa għamilt maratona u qed nipprepara għal oħra .. taqta’ qalbek qatt .. pass pass u tasal!
