Ilwien minn kull tip. Disinji, kostumi żgħar, kbar, ileqqu, juru kull tip ta’ karattri li jdaħħluk f’epoka differenti, f’ħajjiet oħra, artisti, xjentisti. Meta, jekk mhux f’dan iż-żmien tal-Karnival? Jekk għal xi wħud forsi huwa żmien li ma tantx huwa mfittex, iżda għal ħafna żgur li huwa żmien li minn sena qabel kif apparti jgħaddi l-Karnival, ikunu jafu d-data ta’ meta jmiss Karnival ieħor, x’ser jilbsu u x’tema jistgħu joħolqu mal-ħbieb tagħhom, speċjalment jekk wieħed ikun involut f’xi għaqda marbuta mal-Karnival, u saħansitra jidħlu f’xi kompetizzjoni.
Hawn xi wħud fil-fatt jgħidulek li jgħixu għal dan iż-żmien li joffri tant briju, kuluri, atmosfera ta’ divertiment, irrelevanti x’inhi l-età, żmien fejn wieħed huwa aċċettat li jitbellah ftit u jaqta’ mir-rutina ta’ kuljum.
Għal dan il-karnival xtaqna nsiru nafu aktar dwar din l-esperjenza, u fil-fatt iltqajna ma’ Jason Busuttil, Direttur tal-Karnival ta’ Malta u qalilna li fil-villaġġ tal-Karnival, qed isiru aktar żviluppi “li issa ħareġ it-tender u ħa jiġi mogħti, bħalissa għaddejja l-evalwazzjoni tiegħu fejn qegħdin naraw li bejn wieħed u ieħor, jekk dejjem ma jkunx hemm appelli, jibda x-xogħol, jiġifieri l-ewwel tender kien għat-tħaffir u t-tindif tal-post, u jitwaqqa’ l-bini li hemm eżistenti, biex imbagħad bħalissa qed tinħadem it-tender ukoll tal-bini tiegħu, u jekk ma jkunx hemm appelli minn tenders oħrajn, fi żmien xahrejn ser jibda x-xogħol fuq dan il-hub li fih ser ikollu entitajiet oħra u mhux biss villaġġ tal-Karnival.” Għaldaqstant issa dan il-proġett jinsab fil-viċin ħafna u nħarġu l-permessi tal-MEPA, u ġew mogħtija xi fondi mill-Unjoni Ewropea wkoll.
Tkellimna wkoll dwar il-livell tal-Karnival f’pajjiżna u jekk dan laħaqx l-ogħla livelli, u wieġeb li “l-Karnival kiber b’tali mod li lanqas nistgħu nlaħħqu miegħu, jiġifieri issa, nenfasizza fuq il-kelma kwalità, għax illum il-ġurnata m’għadniex naraw karrijiet sempliċi, jiġifieri fejn sempliċiment nivvintaw storja ta’ xi tfal jew ta’ xi buffi u nagħmluhom fuq il-karrijiet. Illum sirna nimitaw u nagħmlu personaġġi li huma kemm ħajjin u anke mejtin.” Huwa kompla jispjega li fil-fatt din is-sena ser naraw nukleu kbir ta’ artisti fuq il-karrijiet, karattri bħal Berlusconi, Buffon u bla dubju anke karattri Maltin li dawn jinżlu għasel ma’ ħafna nies bħal Joseph Armani, għax issa “tajnieh xejra differenti u qed naraw li anke bħala suġġetti qed nimmaturaw, anke fejn jidħol mekkaniżmu u d-dawl li sirna naraw fil-karrijiet, u ovvjament dawn qed naraw li qed iħabbtuha ma’ ta’ barra.”
Dan għaliex anke kumpaniji barranin qed jgħidu dwar il-livell tagħna l-Maltin fejn jidħol il-karnival, kif “tlajna skaluna oħra, u dan ifisser xi ħaġa għax turi li l-artisti tagħna tgħallmu u huma bravi wkoll daqs ħaddieħor, u trid tqis ukoll li dawn huma kollha volontiera, jiġifieri għandna artisti bravi li qed joħolqu, insemmi l-wirja li marret tajjeb ħafna li għandna fi spazju kreattiv; fejn hemm anke rjus li ntużaw fil-Karnival fis-snin l-imgħoddija, u llum il-ġurnata għalkemm għandna kwantità, issa qed inqarrbu anke lejn il-kwalità wkoll.”
Biex jiġi organizzat il-karnival bla dubju jinvolvi ħafna impenn u preparamenti, u għalhekk tajjeb li jinħareġ programm li juri l-attivitajiet kollha li ser ikun hemm matul il-jiem tal-Karnival, li dan “jibda b’mod uffiċjali mill-Ħadd ta’ qabel fil-Ħamrun, fejn kien maħnuq bin-nies, u li fih kien hemm sett maskaruni u ħames karrijiet, jiġifieri kien hemm street parade vera tajba fil-Ħamrun.” Iżda wieħed żgur li jkun qed jistenna bi ħġaru r-Re tal-Karnival li ser narawh il-Ġimgħa fil-Belt Kapitali, Valletta, magħmul mill-kumpanija li ilha tletin sena tagħmel ir-Re tal-Karnival; li kif żvela magħna Jason huwa Paul Curmi, magħruf bħala l-Pampalun, li huwa żgur sinonimu mal-Karnival, tista’ tgħid ir-Re Malti nnifsu fejn jidħol il-Karnival.
Ser jiġi wkoll organizzat il-ballu li ilu jiġi organizzat għal diversi snin, “għalhekk din is-sena r-Re għandu daqsxejn storja ta’ anniversarju, għax ser ikollna kemm lill-Pampalun u anke Charlie, li kien miet b’aċċident; tnejn min-nies li ħadmu ħafna għall-Karnival, u għalkemm dawn huma nies li m’għadhomx magħna, imma rreplikajniehom fuq il-karrijiet, jiġifieri x-xebh tagħhom, u l-immudellatura tagħhom huwa perfett, tant li meta tellajna ras il-Pampalun kulħadd qal x’biċċa xogħol din.” Dan juri kemm l-artisti li huma involuti fil-Karnival, saru jagħmlu xebh inkredibbli fejn jidħlu karattri.
Wieħed forsi jkun qed jistenna wkoll iż-żfin, fejn gruppi kbar f’sinkronija waħda jwasslu tema b’kostumi tant sbieħ, li jikkonferma Jason “il-livell kiber ħafna, fil-fatt bgħattilhom messaġġ u għedt li lanqas irrid inkun xagħra fil-ġisem tal-ġurija li ser jassessjaw liż-żeffiena din is-sena, għax litteralment iż-żfin u l-kostumi li ser naraw din is-sena huma inkredibbli għax il-livell tela’ ħafna.” Dan grazzi wkoll għall-investiment minn Festivals Malta li jibagħtu wkoll inġiniera biex jiċċekkjaw il-karrijiet, tgħallmu wkoll il-Health and Safety.
Fil-proġett li ssemma qabel, dak tal-villaġġ, issa ser ikunu jistgħu jinħadmu wkoll il-kostumi, il-maskaruni u l-garaxxijiet fejn jinħadmu l-karrijiet ser ikunu ndaqs għal kulħadd allura wieħed jista’ jimmaġina kemm kulħadd ser ikollu aktar opportunità li jkun kreattiv, “għax ser ikun hemm dak kollu li għandu bżonn il-Karnival Malti.”
Għalhekk inħeġġu lil kulħadd sabiex jikkonkorri bi ħġaru u jara dak kollu li ilu jiġi ppreparat għal dawn l-aħħar xhur għax il-Karnival huwa “mimli b’attivitajiet, u nħeġġeġ li kull min dieħel bit-tfal biex ilibbishom ċappetta b’numru tat-telefown biex hekk f’każ li jintilfu jkun aktar faċli li jiġu identifikati, għax jidher li ser ikun hemm influss kbir ta’ nies!”
