Illum, għall-ħabta ta’ 12:15 p.m, il-Pulizija ġiet infurmata li kien hemm persuna feruta fi Triq ix-Xatt ta’ Bormla, Bormla.
Il-Pulizija tad-Distrett marru mill-ewwel fuq il-post u minn investigazzjonijiet preliminari li saru rriżulta li raġel Ingliż ta’ 58 sena residenti Bormla, kien qiegħed fuq bankina u dak il-ħin waqfet ħdejh vettura. Minn investigazzjonijiet illi saru rriżulta li mill-vettura nieżel raġel u allegatament aggredixxa lill-vittma.
L-allegat aggressur reġa’ riekeb fil-vettura u ħarab minn fuq il-post.
Immedjatament issejjaħ tim mediku li ta l-ewwel għajnuna u ambulanza li ħadet lir-raġel l Isptar Mater Dei għall-kura meħtieġa. Aktar tard hu ġie ċċertifikat li qed isofri min ġrieħi gravi.
Il-Pulizija għaddejja bit-tfittxija għall-aggressur waqt li għadhom għaddejjin bl investigazzjonijiet tagħhom.
