Ingliż ta’ 27 sena tilef ħajtu wara li sab ruħhu f’diffikultà waqt l kien qed jgħum ġo pixxina.
Kien ilbieraħ għall-ħabta tat-7.45p.m. meta l-Pulizija ġiet infurmata li kien hemm persuna li sabet ruħha f’diffikultà waqt li kienet qed tgħum f’pixxina fi Triq it-Trunċiera, San Pawl il-Baħar.
Ir-raġel ingħata l-ewwel għajnuna minn nies li kienu fuq il-post u baqgħu jassistu sakemm waslu l-paramediċi.
Huwa ttieħed l-Isptar Mater Dei b’ambulanza iżda sfortunatament ġie ċċertifikat mejjet ftit tal-ħin wara.
Il-Maġistrat tal-Għassa Donatella Frendo Dimech ġiet infurmata bil-każ u ħatret inkjesta.
L-investigazzjonijiet tal-Pulizija għadhom għaddejjin.
