Il-manager temporanju ta’ Manchester United Ralf Rangnick insista li hu mhux se jipprova jikkonvinċi lil Paul Pogba biex jibqa’ fil-club wara t-tmiem tal-kuntratt kurrenti tiegħu.
Il-futur tat-player ta’ 28 sena mar-Red Devils huwa wieħed inċert, bil-ftehim tiegħu jiskadi fl-aħħar ta’ dan l-istaġun.
L-aġent ta’ Pogba, Mino Raiola kkonferma li diġà kien hemm “ħafna offerti” għall-klijent tiegħu, u se jkunu jistgħu jibdew taħdidiet ma’ clubs barranin bħala free agent mill-1 ta’ Jannar li ġej.
Il-player internazzjonai Franċiż bħalissa jinsab barra mil-logħob minħabba injury u Rangnick issuġġerixxa li hu ser jiddiskuti l-futur tiegħu ladarba jirritorna, imma jemmen li m’hemm l-ebda post f’Old Trafford għall-players li ma jridux ikunu hemm.
“Jekk player ma jridx jilgħab għal club bħal Manchester United, anke fit-tul, jien ma naħsibx li jagħmel sens li tikkonvinċih biex jibdel moħħu,” Rangnick qal lill-ġurnalisti.
“Dan huwa club enormi, b’appoġġ meraviljuż; ma naħsibx li xi ħadd fil-klabb għandu jipprova jikkonvinċi lill-player biex jibqa’.”