Kmieni t-Tlieta filgħodu, Roma ħabbru li keċċew lill-coach, José Mourinho, b’effett immedjat.
Il-coach Portugiż kellu pressjoni kbira fuqu qabel il-partita kontra Milan, valida mill-kampjonat Taljan, liema logħba tilef bl-iskor ta’ 3-1.
Din it-telfa waslet eżatt wara l-eliminazzjoni mill-Coppa Italia meta sfaw megħluba bl-iskor ta’ 1-0 mir-rivali eterni Lazio.
Il-Giallorossi jinsabu fid-disa’ post tal-klassifika tas-Serie A b’29 punt, ħamsa taħt Fiorentina li jinsabu fir-raba’ post. Huma skorjaw 32 goal u sofrew 24, f’dan l-istaġun.
Mourinho kien ingħaqad ma’ Roma fl-2021, b’kuntratt ta’ tliet snin li fihom rebaħ il-UEFA Conference League li kienet l-ewwel edizzjoni.
Il-kuntratt tiegħu ma’ Roma kellu jiskadi f’Ġunju li ġej u t-taħditiet biex iġeddu kienu għadhom ma bdewx.
